Esti fin de selmana Xixón acueye tres conciertos d’artistes mozos qu’usen l’asturianu como llingua d’espresión. Per un llau, dos de los nomes más innovadores d’esta escena, Llevólu’l Sumiciu y Ferla Megía, actúen nel Cortogijón, festival de cine y música que ta cellebrándose hasta esti sábadu 6 ente la Escuela de Comercio, el CMI d’El Llano, el Paraninfu de La Llaboral y el Dilema Indie Club. Pel otru llau, Les Cigarreres entamen unes Xornaes Pola Oficialidá nes que van actuar Loína.
El primer de los conciertos va ser esti xueves 4 a les 18.30h nel CMI d’El Llano. Nél, Ferla Megía aporta al Cortogijón p’amosar la so versatilidá como músicu gracies a amestar música tradicional, urbana, electrónica, cantares n’asturianu y castellanu, una pergrande variedá de samples y inspiraciones. D’otra banda, pal vienres 5 el llocal Les Cigarreres axunta música y lliteratura na primer sesión de les sos Xornaes Pola Oficialidá. A les 19h Damián Barreiro va presentar el so llibru nuevu Asturianía Kistch, mentes que Loína, tríu de folk atlánticu de cámara formáu por Julio Rodríguez y los hermanos Andrea y Rodrigo Joglar, toquen a les 21h.
Pa rematar estes tres cites xixoniegues y gratuites cola música moza del país, el festival Cortogijón amuesa’l so compromisu esti añu colos nuevos sones n’asturianu y programa tamién una actuación de Llevólu’l Sumiciu. El sábadu 6 les 20.30h nel Paraninfu de La Llaboral, el dúu d’electrónica de raigañu va facer una sesión audiovisual ininterrumpìda na qu’ufre la so música yá publicada xunto a material inéditu. Y dende la medianueche, folixa nel Dilema Indie Club, ún de los pocos llocales nocturnos de Xixón nos que davezu pue sentise música n’asturianu.
Suscríbite a les nuestres novedaes
