El XIX Mercáu Tradicional La Flor de L.lena axunta más de 10 actuaciones folk, rock y de música y baille tradicional

Esti fin de selmana aporta una de les cites imprescindibles cola cultura asturiana, el Mercáu Tradicional La Flor de L.lena. El barriu La Caleya de La Pola acueye dende la mañana del sábadu hasta la nueche del domingu, cuasi una quincena d’actuaciones nes que va haber conciertos, pasucáis, tarde en danza y actuaciones d’agrupaciones folclóriques, amás d’otres actividaes culturales: cuentacuentos, circu, gastronomía, títeres, talleres, artesanía…

La música va entamar a sonar el sábadu 6 a les 10.30 de la mañana coles alboraes de gaita y tambor; el pasucáis a les 11.30h de la Banda Gaites Güestia, organizadora actual del eventu en collaboración col Conciyu L.lena; y la sesión vermú a les 14h amenizada pol Grupu Folclóricu Blimea. Na programación de la tarde actúa a les 20h el grupu de versiones La 402, y yá pela nueche, dende les 23h, van xubir al escenariu’l míticu gaiteru José Manuel Tejedor en formatu tríu y el grupu ska-fusión La Tarrancha.

El domingu 7 va haber muncha música y baille tradicional. A les 10.30h la Bandina’l Pelegrín va facer l’alborá y el pasucáis; a les 11h desfila y actúa’l grupu baille La Flor de Xanzaina; a les 11.30h hai cantarinos pel mercáu con Cacía y a la una’l mediudía Al son la talambera van tar coles sos panderetes nel horru del mercáu. La mañana zárrase col conciertu especial Sones y cantares d’Asturies que van dar la pernomada cantante Anabel Santiago, les pandereteres Compañeras y el multiinstrumentista Luis Álvarez Pola.

Tarde en danza

Pa rematar estos dos díes enllenos de cultura de raigañu a les 18.30h del domingu va haber una Tarde en Danza cola participación de la Banda Gaites Güestia & Collacios, el grupu folclóricu L’Artusu de Figareo y Pandereteros d’Anguaño. Y a lo último, la formación l.leniza de versiones rock Luz de Gas va tocar a les 22h nel escenariu asitiáu nel barriu La Caleya, espaciu qu’acueye la mayor parte de les actuaciones.

Dexa un comentariu

X