El pasáu 1 de marzu el míticu músicu de la escena tradicional gallega, Xabier Díaz, asoleyaba’l so trabayu nuevu Axúdame a Sentir, un álbum en collaboración con Adufeiras de Salitre. Agora’l músicu ta enmarcáu nuna xira qu’aporta al Teatru Nuevu de La Felguera (Llangréu) el próximu sábadu 20 d’abril a les 20.30h y con entraes a 16 euros que yá se pueden mercar na web d’A Mansalva, organizadora del eventu.
Nesti conciertu tamién va collaborar una de les voces más destacaes d’Asturies: Marta Elola. L’actual directora musical de Muyeres y veterana componente de formaciones de música tradicional participa n’Axúdame a Sentir. Una collaboración que surde dempués de que Xabier Díaz prometiera nun conciertu n’Asturies tocar un tema d’equí. Asina naz esta xuntanza qu’ufre una versión del tradicional Ramu de Borbolla del oriente asturianu. Amás d’ella, van xubir al escenariu otros artistes asturianos por confirmar.
Xabier Díaz (A Coruña, 1969) ye ún de los nomes más importantes de la música tradicional gallega. Entamó a tocar la gaita pelos años 80, especializóse na percusión tradicional y formó parte de bandes mítiques folk como como Xacarandaina, Rumbadeira, Berrogüetto y n’aCadaCanto, esta última xunto a otros pernomaos músicos de la so tierra como Guadi Galego, Xosé Lois Romero y Guillerme Fernández.
Con dellos premios al costazu, dende 2014 toca xunto a Adufeiras de Salitre, coles que tien publicao cuatro discos. Dieron cuasi 400 conciertos y actuaron en sitios como Buenos Aires, Oslo, Lisboa, Alger, Glasgow, Madrid, Bariloche, Colonia, Londres, Gotenburgo, Roterdam, Bruxeles o Gante. Anguaño, sigue a la gueta de nueves formes pa da-y vides nueves a aquellos sones qu’enllenaron el coral d’aquel rapaz que dexó l’arquitectura pol amor a les ruxideres.
Suscríbite a les nuestres novedaes
