Otru mes más la Taberna Cuévano de Siero sigue dinamizando la escena musical del país cola so programación d’eventos. En xunu va haber varies cites cola música rock, blues y folk y, dientro de la programación de música asturiana destaquen trés actividaes: un conciertu-espicha de Corquiéu esti sábadu 13 de xunu; la presentación del discu de Rubén Bada‘l vienres 19 de xunu y una jam session folk el miércoles 24.
La Espicha’26 ye una de les cites más destacaes del mes. Esti sábadu 13 a les 13.30h actúa’l veteranu grupu folk Corquiéu nun eventu qu’entemez gastronomía y música tradicional. El preciu ye de 35 euros y inclúi vermú, espicha con productos asturianos y d’otres partes del mundu, amás de la actuación musical de la banda ribeseyana, una de les más pernomaes de la escena.
Pal vienres 19 a les 21.30h, el multiinstrumentista Rubén Bada continúa la xira presentación del so primer discu homónimu. Nesti álbum, el músicu amuesa la visión más personal de la tradición al traviés d’igües y composiciones nueves dividíes en trés partes: ‘Guitarra’ tien seis cortes con pieces interpretaos en xéneru instrumental; ‘Vigulín’ son cuatro cortes nos qu’ufierta pieces mui lligaes a la tradición del baille: xotes, muñeres, agarraos, etc., dalgunes tradicionales, otros de composición propia; y ‘Cantares’ ye la parte dedicada a les coples y les melodíes tradicionales y populares, de chigre, pal baille, de tonada…
La programación cultural complétase cola iniciativa Los miércoles de la cultura, una serie d’actividaes con entrada llibre qu’entemecen distintes disciplines artístiques. La música d’espresión asturiana va sonar el miércoles 24 a les 21h con una nueva jam session folk dedicada a la tradición sonora d’Asturies y d’otros países del Arcu Atlánticu.
Suscríbite a les nuestres novedaes
