Esti fin de selmana La Pola Siero va acoyer dos cites bien destacaes de dos formaciones nueves venceyaes ente sí: Cuévano y Fayéu. La primera d’elles toca’l vienres 30 a les 20h nel Teatru Auditoriu de La Pola y, na so actuación, va haber varies collaboraciones destacaes de la música’l país. La segunda, va dar el so primer conciertu esti sábadu 31 a les 21.30h na Taberna El Cuévano. Dambes cites son de baldre.
Mariluz Cristóbal Caunedo, Anabel Santiago, Ún de Grao, Diego Fernández, la Banda Gaites El Gumial y les bailladores Lluci Arias y Fani Moro son les persones que van xubir esti vienres al escenariu con Cuévano, «superbanda» creada a primeros d’esti añu por doce destacaos con intereses y trayectories mui diverses: Xuacu Amieva a la gaita; Julio Rodríguez -50 años menor que l’anterior- al bouzuki; Carlos Velasco y Alicia Villanueva como voces principales; José Alfredo Cordero, Maje Llames, Leti Cienfuegos y Alba Cuadra como coristes; Dani Álvarez como multiinstrumentista; Chino «El Indio» a la guitarra; Simón San José a la percusión; Alex Petu al baxu y Iván Testón como lletrista y l’alma mater del proyectu.
D’otra banda, en mayu presentóse a traviés de les redes sociales Fayéu, grupu que comparte con Cuévano a Iván Testón na so formación y que nació a iniciativa del xoven gaiteru Pablo del Cuadro. Los nueve componentes que formen la banda son Mónica Sánchez (voces), Nel Cortizo (flauta, gaita, percusiones) el mantáu, Pablo del Cuadro (gaita, whistle), Diego Fernández (vigulín, uilleann pipe), Lluci Arias (teclaos, vigulin, percusiones, coros), Nacho Narciandi (percusiones), Imanol Rimada (banjo), Andrés García (guitarra) y Testón a les lletres y coordinación.
Con estos dos conciertos en La Pola d’esti fin de selmana va poder vese n’escena a dos de los nomes nuevos del folk asturianu y a les sos propuestes caracterizaes por axuntar una montonera de componentes y da-y puxu a los raigaños sonoros del país.
Suscríbite a les nuestres novedaes
