Esta primer metá del s. XX foi terrible, la verdá: guerres grandes y pequenes, la bolsa, la epidemia del gripe, fronteres diendo y viniendo, inestabilidá política… España pasó de reinu, a dictadura y a república, por una guerra civil y depués otra dictadura. Pero pa lo que vamos falar, podemos marcar una llínia, enantes y dempués de la Guerra Civil (1936-39).
Enantes: la etnomusicoloxía concienzuda y respetuosa floriaba per tolos rincones, la Institución de Llibre Enseñanza (I.L.E.) y la Segunda República impulsaron la cultura como enxamás na hestoria española, y nótase en grupos como la xeneración del 27.
Dempués: La etnomusicoloxía quedó nun enfoque ideolóxicu y políticu, y la Sección Femenina encargóse de purificar la tradición. La I.L.E. prohibióse, entartallóse y escorrióse. Prohibiéronse los movimientos musicales de vanguardia y hubo una fuga masiva d’intelectuales lliberales que, amás, tarrecíen pola so vida.
Y namás un apunte más: Thomas Edison inventó’l fonógrafu 1877, pero nun s’usó con fines etnomusicolóxicos hasta 1890 n’Estaos Xuníos con tribus americanes y n’Europa a partir de la primer década del s. XX. Y con esto más o menos claro, entamamos:
«Podemos marcar una llinia, enantes y dempués de la Guerra Civil. Enantes la etnomusicoloxía concienzuda y respetuosa floriaba; dempués quedó nun enfoque ideolóxicu y políticu, y la Sección Femenina encargóse de purificar la tradición»
La Rumanía d’un húngaru. De 1905 a 1914 Béla Bartók y Zoltán Kodály percorrieron distintes zones de Rumanía y Eslovaquia con un fonógrafu y dellos cuadiernos de música. Años más tarde percorrió Bartók solo’l norte d’África.
Yá abrí estos artículos citando a esti autor, porque foi un gran pianista y un gran compositor, qu’amás de dedicar años de la so vida al trabayu de campu y al estudiu metodolóxicu de la música tradicional, fixo obres maestres con ella, dende l’amor y el respetu. Y desenvolvió tou un llinguaxe harmónico y rítmico que tardaría décades en ser entendíu. La Segunda Guerra Mundial obligó-y a fuxir a EEX.X, y dende ellí, echando de menos Hungría, siguió trabayando.
La pieza que vos dexo ye de la so primer etapa, posó les maletes en 1914 pola Primer Guerra Mundial, y en 1915 escribió yá sacó esta guapura.
La Inglaterra d’un inglés. Esti home caleyó pelos caminos ingleses con un fonógrafu y un bloc de notes dende 1903 hasta 1914, rescató unas 800 pieces. La Primer Guerra Mundial punxo fin al so trabayu y a partir d’entós namás fixo dalgún viaxe puntual.
Y ye qu’amás yera un gran compositor, bien grande, y fixo un trabayu maraviyosu coles pieces que foi arrexuntando. Dicía que la melodía tenía de presentase cenciella, pura, y l’acompañamientu sofitala, arropala.
La pieza que vos dexo, ‘Spurn Point‘, ta dedicada a la so amiga la violonchelista May Mukle, y dexó una nota maraviyosa: que la melodía tenía de tocase «con amor» y por eso la fixera pa ella.
L’Asturies d’un gaditanu. Falla taba estudiando en Francia cuando españó la Primer Guerra Mundial, y ellí escribió estes pieces pa la soprano griega Ida Gobedska, a quien les dedicó. Pero finalmente estrenáronse en Madrid en 1915, porque tuvo que dise de París.
Años más tarde españó la Guerra Civil equí, y tuvo que colar a Arxentina. Franco intentó que volviera, pero nun lu fixo, nunca volvió a España.
La pieza que vos dexo, ‘Asturiana’, nuna versión maraviyosa d’Estrella Morente, vien del cancioneru harmonizáu: «100 cantos populares Asturianos» (1980), de José Hurtado, que tando en Madrid, recoyía los cantares que los emigrantes asturianos llevaban nel gargüelu.
Una asturiana n’Asturies. Maite foi un compositora asturiana a la que la Guerra Civil tamién-y torció la vida; ella foi a México. Más conocida fuera que dientro, como suel asoceder, amás siendo muyer.
Nel so trabayu vese claramente lo que fixo la guerra nella, l’enantes y el dempués, la señardá y la murnia por marchar. De trés sinfoníes que tien, dos falen d’Asturies y una de México; tien bien de producción y fala de siguío del verde, de los montes, del frescor del aire, de l’alloñanza…
Esta pieza que vos dexo ye la primer pieza que se-y conoz, muncho primero de tener que dise. Güel a Asturies con allegría.
L’Asturies de los asturianos. Pa zarrar a lo grande y con murnia al empar. En 1920 salió a la lluz la mayor y meyor escoyeta de música asturiana que tenemos: el Cancioneru musical de la llírica popular asturiana.
Esti home, Eduardo, caleyó Asturies entera con un cuadiernu de música pa esti primer llibru, y col cuadiernu y un fonógrafu pal segundu, que nunca salió a la lluz porque, a diferencia de Jesús Bal y Gay, el so collaborador, que llevó pa México’l material gallegu que tenía, Eduardo dexó equí’l suyu, y col fin de la guerra tuvo que marchar por pates a Inglaterra. Asina que namás se caltien daqué de material que pudo llevase y la familia donó, y dellos tubos de cera y discos de pizarra que tán nel agora CSIC, y nin tan siquier tán toos dixitalizaos.
Pol interés, déxovos esti par d’audios: ‘Paloma del palomar‘, ‘Danza de San Juan’ y ‘La molinera‘.
Y del so trabayu hai dos caminos pa cuntar:
Dende’l mundu académicu: grandes músicos lo tuvieron presente pa dar color y xiros a la so música, como Joaquín Rodrigo, Halffter… pero ese curiáu pola melodía que vemos en Bartók, en Williams, en Falla, non tanto… Y otra cosa, que si soi sincera, duelme personalmente. Dende 1987 el Conservatoriu Superior de Música d’Uviéu llámase «Eduardo Martínez Torner». Yo estudié nél va unos años y nun tengo alcordanza que se fixera nada na so memoria, nin que nos dixeren quién yera, nin que nos animaren a averanos al so trabayu. Por cuenta de esti artículu, pregunté a vieyos compañeros y a alumnos d’agora, y polo que sé, nun camudó nada y sigue siendo un desconocíu pa los estudiantes del centru que lleva’l so nome. El Conservatorio Profesional de Música d’Uviéu llámase «Anselmo González del Valle» dende 2018 y va pel mesmu camín. Podríamos querenos más y meyor.
Dende la música tradicional ye otru tema, y gracies de corazón por caltener viva la so heriede. Déxovos namás dos exemplos bien claros colos qu’inclusive se puede atopar la pieza del cancioneru qu’usen: ‘Baxaben cuatro ayeranos’ del discu Tierra (1997), de Felpeyu y ‘Xiques de Torner’, del discu Un tiempu meyor (1999), de Llan de Cubel.
Y nun falamos de zarzuela, nun falamos de cantar llíricu, nun falamos de les primeres grabaciones de tonada… quedó muncho y munchos fuera… dígovos como nel anterior, si queréis rascar más, dexáilo en comentarios. La selmana que vien toca’l postreru, la segunda metá del s. XX, que yá nos dirá sonando más a toos… o non…
Suscríbite a les nuestres novedaes
