Siento un amor fondo pola«música académica», la de tresmisión escrita, con autor reconocíu, suxeta a les modes y a los gustos de cada dómina; tamién llamada clásica, anque «clásica» faiga estricta referencia namás a la del Clasicismu. Y tamién siento un fondu amor y respetu pola «música tradicional», de tresmisión oral, ensin autor reconocíu, y que como dicía Béla Bartók: “ye un fenómenu de la naturaleza, qu’aparez espontáneamente, naz de lo cotidiano y de les necesidaes de la vida… y sigue lleis internes que nun dependen de les modes (nin de la industria, -añado yo-)”.
Y pola fonda distancia a la qu’aparentemente suelen vivir una d’otra, escribo esti artículu: una llista de momentos nos qu’innegablemente cruciáronse, surdiendo d’ellos dalgunes de les pieces más guapes que conozo.
«L’enclín que tien la música académica a sentise perimportante nun fai otra cosa que poner vendes nos güeyos y l’enclín de la música tradicional a sentise pequena, fai que se pierda un saber, que si nun se trata con ciñu, nun tien reemplazu»
Porque esa distancia nun ye cierta, y l’enclín que tien la música académica a sentise perimportante nun fai otra cosa que poner una venda nos güeyos a quien nun tien interés por ver acullá. Y l’enclín de la música tradicional a sentise pequena, fai que se pierda un saber, que si nun se trata con ciñu, nun tien reemplazu. Y con dambes actitúes salimos perdiendo. Nun ye más sabiu’l que más llibros escribe, como nun tien más razón el que fala más alto.
En cuatro artículos curtios, voi falar de cómo a lo llargo de la historia, músicos relevantes bebieron de la música tradicional pa medrar, y a la contra, de la respuesta n’espeyu qu’esto xenera.
Mientres los amplios sieglos qu’estos períodos duraron, lo habitual yera que los grandes compositores tomaren una melodía tradicional o popular y fixeren con ella una «tema y variaciones», esto ye, presentar la melodía la primer vegada que se toca, y dila variando, complicando a cada vuelta.
El cantar de los 1000 años. Compositor británicu. Dientro de la suite pa virginal ‘The Battell’, Byrd recoyó a manera de «tema y variaciones» esta melodía compuesta n’orixe para desfilar escontra la Batalla de Clontarf (1014).
Ye guapo de ver como Planxty (Liam O’Flynn, Andy Irvine, Dónal Lunny y Christy Moore), grupu míticu ya imprescindible de la música folk irlandesa, incluyó esta pieza nel so últimu discu d’estudiu, Words and Music, de 1983.
El hit que duró 250 años. Lo de les folíes foi un bombazu, y dende el 1500 al 1750 nun había salón de la corte européu o tabierna na qu’esti temazu nun sonara. D’orixe español o portugués, pero foi un español el primeru en poneles en papel, Alonso Mudarra, y col tiempu dieron en llamase ‘Folías d’Espagne’. Pasaron per manos de compositores como Kapsperger, Lully, Marin Marais, Scarlatti… anque foron les de Corelli les qu’algamaron más sonadía.
La pervivencia per tantos sieglos venía de la llibertá, de qu’en realidá yera un esquema harmónicu nel que poder poner el to gustu, les tos capacidaes y les ganes que tuvieres esi día, y en cada vuelta facíes lo que queríes.
Y güei nun vos traigo les famoses, tráigovos otres que s’inspiren neses, y vais ver como vos suenen a cerquina de casa… ‘Folías Gallegas’de Santiago de Murcia, guitarrista y compositor español.
El primer folki. Telemann taba llocu pol «estilu polacu» y pola «improvisación bárbara», que nun yera otra cosa que lo que tocaben los músicos «tradis» de les tabiernes polaques a les que-y gustaba dir de comedia. Él mesmu dixo: «cualesquier qu’emprestara muncha atención podría pescanciar n’ocho díes abondes idegues musicales pa toa una vida».
Y a lo llargo de la so carrera integró esta «frescura» na so música sofisticada barroca, y munches vegaes abandonó esta «sofisticación» porque la frescura bien llevada, presta.
El mayestru de mayestros. Arpista y cantante irlandés, ciegu pola viruela dende los 18 años, diba de pueblu en pueblu y de casa en casa, recoyendo música y escribiéndola; podíen retrasar una boda esperando a qu’él llegara. Yá en vida tuvo detractores, decíen que taba demasiáu influyíu pol barrocu y pol so amor pola música de Corelli, pero entemeció dambes corrientes a la so manera, l’académica de la so dómina y la tradicional, dexó más de 200 melodíes escrites (ensin harmonizar), un trabayu irremplazable, y na actualidá toquen la so música mesmo músicos académicos como músicos de la redolada tradicional.
Del Clasicismu, nun vamos falar, tanto amor polo nuevo fixo que s’usara menos lo que yá había, anque Haydn, obligáu a estrenar cuasi toles selmanes una pieza nueva, sí tiró de la tradición pa nutrise; y en realidá toos, grandes y pequenos, siguieron inspirándose nella, porque lo bien fecho, bien paez.
Siguimos la selmana que vien col sieglu XIX, Romanticismu y Nacionalismos, equí entamó otra manera de facer les coses que llega hasta los nuesos díes.
Suscríbite a les nuestres novedaes
Un comentario
Un trabajo interesante, donde se recupera información que pocos conocen!