Rubén Bada ye ún de los músicos con mayor experiencia y trayectoria de la escena folk y tradicional, amás d’haber trabayao n’otros estilos. Tien tocao y grabao con una montonera de proyectos y artistes, habiendo formao parte de grupos que ya se consideren icónicos dientro de la escena, como Xéliba, DRD, L-R, etc. Falamos con él sobre la so trayectoria, la so concepción de la música, y el so trabayu nuevu: un primer discu en solitario.
Buenes Rubén, gracies por acoyenos. Quería entamar entrugándote aspectos fuera de lo musical, so la to vida. La primer entruga que te faigo ye: ¿D’ónde yes?
Pues mira, yo nací n’Avilés, porque yera l’hospital que taba más cerca d’onde vivíemos. Mio pá yera de Cardo, en Gozón, que ye onde pasé yo los dos o tres primeros años de mio vida. Dempués tuvi en Priendes, en Carreño… Asina que soi un poco de Peñes interior. D’ehí tiramos pa Les Vegues, en Corvera, que ye un barriu d’esos que nacieron a la solombra d’Ensidesa. Entós, en realidá yo soi de munchos sitios, pero de nengún al empar. Pasé tamién una montonera tiempu en Belfast, n’Irlanda, que ye onde fice un poco la mili musical. D’ehí torné p’Avilés, y agora toi equí nel Conceyu de Grau.
Y, de toos esos sitios, ¿d’ónde te sientes?
Pues en realidá, como se suel dicir, «la vaca ye d’onde pastia». Pues yo un puquiñín eso. Siéntome d’onde toi nesi momentu, onde desendolco’l mio llabor, onde trabayo, onde vivo, onde ta la xente que quiero. Agora mesmo soi d’equí, del Valle de Cuaya, de Grau.
Tamos nun pueblín que se llama Baselgas, nun entornu mui rural. ¿Tien rellación el vivir nel rural cola manera d’entender el to trabayu? ¿Ye diferente respecto a otros sitios onde vivisti?
Caro, los primeros años de mio vida yo vivía nun pueblu… Pues eso, nietu de ganaderos, como munchos. Mio pá trabayaba nel puertu, en trabayos venceyaos a Ensidesa tamién. D’ehí marché pa un barriu industrial, obreru. Foi un cambiu super traumáticu en su día, porque yo venía de tar como una cabra. Yo taba sueltu ellí en Priendes, y cola edá del mio fíu, qu’agora nin se m’ocurriría dexalo, marchaba al pueblu d’al llau pa dir a casa mio güela, díbemos en bicicleta y andábemos tol día per ehí tiraos. Y de sópitu alcuéntrome nun barriu industrial con tola problemática qu’había nos años 80… La primer nueche que pasé yo ellí, quemaron un coche al llau de casa. Yonquis per tolos llaos… un entornu bastante duru. Volver agora al rural, a la hora de trabayar… ye más una llección de vida qu’un sitiu pa trabayar. El mio trabayu podía facese en cualquier llau. Equí tengo la suerte de tener un sitiu onde nadie me molesta, onde nun molesto a nadie… entós puedo tar trabayando tranquilu ensin tocar les narices. Nuna ciudá yá tienes que tener un llocal, tienes qu’insonorizalu… la problemática de tolos grupos.
N’esos años d’adolescencia, y llueu yá cuando t’enfocasti profesionalmente na música, ¿qué influencies teníes? ¿Qué entamaste sintiendo? Y, ¿Cómo llegasti llueu a la música tradicional?
Bono, yo’l primer recuerdu musical que tengo ye’l del gaiteru, el día de la fiesta’l pueblu, ehí en Priendes. Yera nuna fiesta que se llama L’Ángel, diben faciendo una procesión col santu hasta la ilesia, y diba tocando’l gaiteru col tamboriteru, y a mí eso yera una imaxe que me marcó dende siempre. Yo ablucaba con aquella gaita, muchísimo. D’ehí, el mio primu yera rockabilly, entós yo tenía acceso a tola colección de discos que tenía… Yo yera un neñu d’ocho o nueve años. Y a mí encantábame. Con doce años, los mios grupos favoritos yeren los Stray Cats y los Cramps, yera una cosa lloquísima. Pero siempre tuve la mente mui abierta. Yera mui fan tamién de Franco Batteato. Yera lo que sentíes pela radio, nun teníes accesu a música acullá de lo que comprares en tiendes o lo que te poníen pela radio. Si te gustaba daqué un poco underground, como pasaba col rockabilly, teníes que currátelo, teníes que dir a catálogos. Incluso cuando entamé a faceme folk… si sentíes un discu que te gustaba, buscabes la discográfica, dibes a la tienda y pidíes el catálogu, pa ver qué más teníen d’esi palu. A vegaes traíenlo y dexábente sentilo pa decidir si lo comprabes o non, y otres vegaes lu pedíes y te lu comíes. Requería un esfuerciu. Eso marcóme tamién bastante a la hora d’escoyer la música que siento. Tovía ye’l día de güei que cuando dalgo ye demasiao fácil, nun m’espierta interés. Tolo que se siente agora, qu’abres el teléfonu y ta too ehí… Paez qu’hai demasiao, pero bueno…
Nesos años nos qu’entres en contacto cola música tradicional, o col folk, dices nel documental ‘Onde soi quien quiero ser’ que foi Ígor Medio la primer persona que te puso un bouzouki nes manes, y entamasti dempués a tocar col grupu Xéliba. ¿Cómo fueron esos entamos? ¿Cómo empezaste a dir a sesiones o a conciertos de folk? ¿Cómo te metiste un pocu nel estilu?
Pues esos entamos… como too, cuando descubres daqué, sobre manera na adolescencia, son tiempos de muncha ilusión. Yo tenía un par de compañeros ehí nel institutu que-yos gustaba’l folk. Tenía un collaciu que tenía raigaños en Galicia, entós tenía cintes de Milladoiro, de The Pogues… otru compañeru que tocaba’l vigulín, Iván, pasóme la primer cinta de The Bothy Band… Entós, de sópitu esi gaiteru que diba caleyando Priendes p’arriba, taba acompañáu de guitarres, bouzoukis, percusiones… De sópitu esa música taba na época que tábemos viviendo. Eso yera flipante, y entrugábame por qué non lo había equí. Y descubrí que sí que lo había. Taben Llan de Cubel, taba Felpeyu entamando. Yo fui a un conciertu pola oficialidá, llevónos mio padre a esti compañeru míu, a Pablo, el vigulineru, y a mí. Fuimos a Xixón, yera na Plaza Toros. Tocaben Xéliba, Cambaral, Balandrán, Felpeyu y Dixebra, pienso. A mí esto del bouzouki sonábame de velo nos créditos de los discos, pero nun tenía mui bien ubicao yo lo que yera un bouzouki, porque nos métodos de guitarra que tenía, salíen dalgunes fotos pero yeren bouzoukis griegos, y yo l’instrumentu que taba viendo nun se correspondía nin cola estética nin cola música que se facía. Según terminó’l conciertu, yo fui p’allá como una flecha, porque tábamos ablucando. Entrugué: Oi, ¿qu’instrumentu ye esi? Y díxome Ígor, «pues mira, ye un bouozuki». Sacólu de la funda, así arrogante como yera y dixo: «ala, tómalo». Rasgueélu y naquel momentu foi como si m’españara la tiesta. Taba ellí la madre d’Ígor, Sonia, y apuntáronme unes direcciones de constructores. Yo al día siguiente llegué a casa y lo primero que fici foi poneme a escribir una carta n’inglés. Dempués falé cola profesora del institutu pa que m’ayudara a revisalo too. Tardabes una selmana n’escribir la carta, mandábesla, nun sabíes si te diba responder. El señor respondía con un catálogu… Tovía m’alcuerdo del día que llegó’l catálogu: despertóme mio madre, «mira lo que te llegó». Tovía lu tengo per dalguna parte. Ehí abrióse una puerta, un camín pel que llevo caleyando hasta agora.
«Otru compañeru que tocaba’l vigulín, Iván, pasóme la primer cinta de The Bothy Band… Entós, de sópitu esi gaiteru que diba caleyando Priendes p’arriba, taba acompañáu de guitarres, bouzoukis, percusiones… De sópitu esa música taba na época que tábemos viviendo. Eso yera flipante, y entrugábame por qué non lo había equí. Y descubrí que sí que lo había. Taben Llan de Cubel, taba Felpeyu entamando»
Amás de facer música, faes coses coles que se puede facer música; yes luthier. ¿Cómo t’inflúi’l trabayu que faes construyendo instrumentos a la hora de facer música
Nun creo qu’a la hora de faer música, m’aporte gran cosa la luthería. Yo la luthería entaméla como un hobby, como una forma de faer daqué que nun tuviera rellacionáu cola música. Pásanos enforma a los músicos, al contrario que n’otros oficios. Cualesquier que trabaya nun taller, pues posa’l monu de mecánicu, mételo na taquilla, y marcha pa so casa y sigue cola so vida; el que trabaya nuna oficina, pues a lo meyor zarra l’ordenador y sigue cola so vida. Los músicos, polo menos los que yo conozo, somos incapaces, siempre tamos con música na cabeza, siempre tas pensando en música, que ye una tortura munches vegaes. Yo quería faer daqué que nun tuviera rellacionáu, anque al empar tenga rellación. Como me gusten enforma los instrumentos, y nun los puedo comprar, porque munches vegaes los instrumentos nun tán fechos pa los músicos que trabayamos, sinón pa coleccionistes, o pa xente que tien cuartos, empecé yo a fabricalos. A la fin ye un hobby bien guay, porque ye terapéuticu, obligate a tar concentráu en daqué, nun pues tar pensando en cantares, tienes que tar a una cosa, y amás oblígate a trabayar la paciencia tamién; tienes que llevar un métodu, un procesu, tienes que planialo tou perbién. Pienso que m’enseña más pa la mio esperiencia vital como persona, que depués eso seguro que m’afecta como músicu, porque primero que músicos tenemos que ser persones
Toques munchos instrumentos distintos, trabayes en delles afinaciones con ellos, ¿de quién puedes decir, tanto en música asturiana como fuera, que fueron influencies, bien a la de pensar la música, o bien a la de desenvolver el to propiu estilu? ¿Discos que te marcaren enforma? ¿Artistes?
Home, discos que me marcaron muncho, pues igual aquellos primeros que sentí, la Bothy Band, porque decáteste de que puedes faer daqué distinto cola música tradicional. Dempués nos 90, Lunasa, el primer discu, foi como una revolución nel so momentu. La primer vegada que sentí a Shooglenifty… Munches vegaes lo de les influencies tira más pola filosofía que tien detrás esa persona, o esi grupu, que la música que faen. A mi inflúyeme más eso. Yo intento que lo que yo faigo suene a mín, y que toes eses influencies, o referencies que tengo na cabeza, tean bien amestadines. A la fin, nengún tamos llibres d’influencies, tolo que faemos vien de dalgún sitiu, en realidá tamos copiando constantemente. Yo intento quedame con eses filosofíes, de xente que lo tien bien claro; pues eso, como Elías, o como Ígor, que teníen per claro lo que queríen faer, y de xuru que si me sientes tocar el buzuki, pues nun vas escuchar muncho d’Elías, o d’Igor, más allá de lo básico. Pero la forma d’entender la música, eso ye lo que m’interesa, la filosofía, lo que ta pensando esa persona. Por eso mos gusta tanto la xente que, tien estilos tan personales, porque son capaces de destilar too eso que tienen alredor, y a mi eso ye lo que m’interesa.
«Yo entiendo la música tradicional, vamos dicir, como dalgo que ta vivo. Si lo entiendes como daqué que morrío, entós ta ende nuna vitrina; sacamos la semeya y tamos recreando esa semeya, una y otra vez. Si lo entendemos como daqué vivo, pos nós tamos camudando, el tiempu pasó, y lo qu’hai equí dientro tamién camudó»
Falando d’esa filosofía musical, podemos falar de L-R, que foi ún de los proyectos más orixinales nos que tuvisti. Leti y tú marcastis un camín, yá taba ellí, pero punxistis de manifiestu una manera d’entender la música distinta de lo que se venía estilando. Amosando que nun depende tanto de los instrumentos que s’usen, el qu’una música pueda venceyase a esi estilu, vamos llamalo… tradicional. L-R tien amiestu, tamién tien muncho de lo propio, pero hai xente, qu’inda nun entiende la música tradicional d’esa manera, que nun considera ciertes coses tradicionales. Por exemplu un bouzouki, pueden dicir que nun ye tradicional asturianu, pero lleva 40 años usándose pa tocar música asturiana, ¿por qué pienses que pasa eso? Fuera d’Asturies ¿tán presentes estos debates, o s’entiende la música d’otra manera?
Yo entiendo la música tradicional, vamos dicir, como dalgo que ta vivo. Si lo entiendes como daqué que morrió, entós ta nuna vitrina; sacamos la semeya y tamos recreando esa semeya, una y otra vez. Si lo entendemos como daqué vivo, pues nós tamos camudando, el tiempu pasó, y lo qu’hai equí dientro tamién camudó.
Entós, si tu entiendes la música como un ser vivu, que’l tiempu va pasando per ella, y tu entiendeste, más que como un guardián de lo puro, o de lo auténtico, como lo que que somos, meros tresmisores… Esto ye, la música llegó a nós, pasa al traviés de nós, y nós pasamosla a la xeneración que venga dempués, y eso yá ye cosa vuestra. Igual que pasa colos praos que tenemos equí al llau, colos ablanos, pues ye daqué que daquién los curia d’una manera, que si viesen como se tán curiando agora, ues igual dicen que ta bien, o que ta mal, pero nun hai nada que podamos faer contra eso.
N’otros sitios pasa lo mesmo, hai asociaciones que pretenden caltener la pureza, pero esto ye como con los nazis: tu nun puedes caltener la pureza, tu puedes pretender faelo, puedes montar un cristu de la so madre, pero a la fin, la xente va tocar la música qu’ellos quieran, colos instrumentos qu’ellos quieran, y de la manera qu’ellos quieran, y contra eso nun pue combatise. Y ye lo que pasa n’Irlanda, por muncho que los puristes digan que los bouzoukis tán mal, que los bodhrans tán mal, tu vas a cualquier sesión y tol mundu los toca. ¿Por qué? Porque nun dexa de ser lo que fixeron los músicos tradicionales siempre: faer música colo que teníes a mano. Si teníes una pandereta a mano, pues tocabes la pandereta, pero si teníes una sartén… qué ye ¿que’l sartén ye un instrumentu musical? Ye lo que teníen ellí al llau, o’l morteru o lo que fuera. Si yo tengo a mano guitarres eléctriques, ¿por qué nun les puedo usar?
«Y ye lo que pasa n’Irlanda, por muncho que los puristes digan que los bouzoukis tán mal, que los bodhrans tán mal, tu vas a cualquier sesión y tol mundu los toca. ¿Por qué? Porque nun dexa de ser lo que fixeron los músicos tradicionales siempre: faer música colo que teníes a mano. Si teníes una pandereta a mano, pues tocabes la pandereta, pero si teníes una sartén… qué ye ¿que’l sartén ye un instrumentu musical? Ye lo que teníen ellí al llau, o’l morteru o lo que fuera»
Siguimos falando de fuera, porque munches vegaes miramos pa fuera, buscando un espeyu nel que poder miranos, y comparamos la escena que tenemos equí, coles escenes qu’hai fuera, con Bretaña, Irlanda, Escocia… ¿Qué crees, qué falta equí pa que la música seya daqué más cotidiano? ¿Ónde crees que ta la diferencia? La forma d’entendelo, les polítiques culturales…
Yo creo qu’esto parte d’un complexu. Cuando tas comparando costantemente, como la xente que tien un problema de autoestima, o un trestornu de l’alimentación, tas pendiente de cómo te ve l’otru, tas pendiente d’Instagram, de les redes sociales, y con eso, lleves les de perder siempre. Lo qu’hai que faer ye mirase a unu mesmu, aceptase, y si mires pa eses escenes, que seya por saber un poco lo qu’hai. Nun somos isles, nun podemos tar equí aisllaos, ensin saber qué pasa fuera. Y ye la primera y fundamental diferencia que veo coles escenes d’esos sitios. Ellos tán arguyosos de la música que tienen, ensin complexos colo que faen. Lo faen y puntu. La música ye una actividá hedonista, ye pa pasalo bien, pa escapanos un poconín de la realidá, o protestar contra esa realidá, o decir que tamos bien conformes con ello. Ye un mediu d’espresión. Teníemos qu’entendelo como tal. Tampoco vamos idealizar lo qu’hai ellí, porque nun vas ellí a cualquier pueblu y ta tol mundu tocando la gaita o tocando’l vigulín y cantando en gaélicu. Ye una realidá bien distinta.
Pienso que si equí aceptáramos que lo que tenemos ye lo suficientemente bono, que lo ye, yá taría. Siguimos con esa mentalidá de que la música asturiana nun ye lo bona abondo pa faer coses con ella, Por eso digo que ¿por qué nun respetamos la estructura de la música asturiana pal baille, pa lo que tea fecha? ¿O por qué nun respetamos la ornamentación o les inflexones que tien o la forma de frasear? Tenemos que miranos y aceptanos, porque una cosa que yo deprendí tando pel mundu, y que sigo deprendiendo, ye que somos muncho más interesantes cuando somos nós mesmos que cuando pretendemos ser lo que nun somos; igual que les persones. Yo creo que tenemos un poco la responsabilidá de reconcilianos con esto y faer que’l mesmu pueblu asturianu se reconoza na música que faemos.
Falando precisamente d’esta música tradicional, ún de los puntos que resulta clave pa xenerar que más xente se avere a ello ye la enseñanza. ¿De qué fontes, documentos o discos tiraríes tu pa enseñar esa música y esi estilu?
Caro, equí tenemos la cuestión. Agora mesmo hai grandes escueles de pandereta, de gaita, pero hai otros instrumentos tamién. Pero yo creo que cuando yá falamos de los instrumentos que yo toco, de guitarra, de bouzouki, igual se punxo demasiada atención na afinación, que creo que ye lo menos importante de too. Y dexóse de llau, vuelvo a lo de siempre, les estructures del baille. Si yá tenemos una pandereta que ta estructurando tola rítmica asturiana, a partir d’ehí cada unu que toque como quiera tocar, que faiga los acentos que quiera, pero tener siempre esa base que te caltenga pegáu a la tierra, a la música que tas tocando.
Toi falando un poco polo xeneral, yo creo que se dio demasiada importancia o se ta dando demasiada importancia a determinaos instrumentos. Yo nun entiendo -y equí voi a moyame yo un poco, que me caigan les que me tengan que caer-, nun puedo entender qu’haiga un instrumentu de música tradicional nun conservatoriu onde nun vas estudiar nin la historia d’esi instrumentu, nin l’harmonía que tu puedes usar con esi instrumentu, nin vas poder facer música nel entornu natural d’esi instrumentu… me paez un despropósitu completu. Ta perbién que tengas un superior de gaita, pero si nun sabes quién ye Binita’i Xuacu, pues mal vamos. O si nun sabes tocar una jota pal baille… Quiero decir… yá existe l’oboe, o’l fagot, tu si toques un instrumentu tradicional deberíes conocer la so historia. La música tradicional asturiana nun tien harmonía. Entós tenemos d’entender d’ónde vien esta música que tamos tocando y cómo puede harmonizase, porque munches vegaes esi ye’l problema. Si intentes usar el sistema clásicu, nun va funcionar, porque tamos falando d’una música modal, d’una música que vien de muncho enantes de que se sistematizara esto, onde tú toques con otros instrumentos que tán a la par que’l tuyu. Yo creo qu’eso diba ser más arriquecedor y que diba poner munchísimo más en valir la música que tenemos, que ye abondo más que los cuatro clixés que se venden.
«Entós tenemos d’entender d’ónde vien esta música que tamos tocando y cómo puede harmonizase, porque munches vegaes esi ye’l problema. Si intentes usar el sistema clásicu, nun va funcionar, porque tamos falando d’una música modal, d’una música que vien de muncho enantes de que se sistematizara esto, onde tú toques con otros instrumentos que tán a la par que’l tuyu. Yo creo qu’eso diba ser más arriquecedor y que diba poner munchísimo más en valor la música que tenemos, que ye abondo más que los cuatro clixés que se venden»
Esta música que tu tienes tanto enfotu en caltener y estudiar ta bien presente nel to últimu trabayu, el to primer discu en solitariu. ¿Cómo llegues a esti puntu dempués de 30 años de trayectoria? ¿Por qué agora y cómo foi’l procesu?
Pues mira, el momentu yo creo que coincidió. Yo nesti discu llevo trabayando yá bastantes años. Esto entamó nun grupu que tenía con Pepín de Muñalén y con Elías y que dempués se convirtió en cuartetu con René Ispierto al contrabaxu. Cuando nos faltó Elías la cosa quedó paralizada por motivos obvios. Dempués llegó’l COVID, yo empecé a xirar con Rodrigo Cueves de forma yá abondo regular y taba L-R funcionando tamién. Coincidió qu’esti branu terminó la xira de Rodri, L-R decidimos tamién faer una parada técnica pa garrar aire y dixi: «pues lo faigo agora o queda ensin faer». Garré un repertoriu ensin pensar demasiao, tenía unos cantares porque me dio por cantar. Elías insistía muncho, «tienes que cantar, tienes que cantar». Si canto ye gracies o por culpa de Elías, caún que lo valore como quiera. Pero bono, pruyíame muncho faer eso, y foi una pantalla que me costó bastante; cantar en público y l’atreveme, inda me cuesta, pero bono, equí tamos. Y la idea, si yo quería cantar, quería tocar el vigulín y quería tocar la guitarra, tampoco diba facer un discu que fuera un pastiche onde nada tuviera sentíu. Si sentís el discu la parte de les pieces de vigulín tien otra estética dafechu distinta y la guitarra sola, nun tien nada que ver nin con una cosa nin cola otra. Entós o faigo trés discos o faigo un discu que tenga trés bloques, un trípticu, que tea bien definíu. Quixi siguir un poco con esta idea que trabayábamos en DRD y dempués con Calea, que ye lo de tocar música pal baille. Por exemplu na parte de vigulín, intenté recuperar repertoriu de vigulineros como Ceferino Traviesas, tocar pieces antigües como la muñeira de Sindo Los Veneiros, dalguna composición mía, pero siempre intentando recuperar esa forma de tocar pal baille que más o menos existía.
La parte de cantares, pues eso, a la mesma manera, y siempre eché en falta’l poder tocar la guitarra yo solu, y ye daqué qu’a mi me gusta muncho, yo estudié guitarra clásica amás, Esos guitarristes como Soig Siberil o Tony McManus, encántenme; siempre quixi faer daqué asina, pero polo que fuera como qu’entendí que nun había demanda d’eso n’Asturies, entós nunca me dio per ehí. Nel mio discu quería tocar la guitarra sola, y a la fin ta diciéndome tol mundu, ¿por qué nun fixisti esto primero?.
Ye un trabayu autoxestionáu, amás nun lu vas publicar en Spotify, apostasti por ponelo en Bandcamp, ¿cuál ye la razón detrás de autoxestionate yá desque empezasti a faer L-R, y cómo enfoques entós l’espardimientu d’estos proyectos, colos qu’apuestes per otres plataformes?
Hai dos cuestiones, una que ye’l ser llibre, el que yo pueda faer la música qu’a mi me apeteza, de la forma qu’a mi me apeteza, poniendo los tiempos que yo quiera, grabándolo como yo quiera, amestándolo como yo quiera, el poder tener control total sobre lo que yo faigo, y eso respuende una parte de la entruga. La otra parte de la entruga, ye’l ser probe. Si yo tuviera munches perres pa faer videoclips de manera profesional, pues de xuru nun me rompía yo la cabeza, y contrataba a daquién pa que me lo ficiera. A la fin la necesidá munches vegaes ye la madre de la creación. Lo de nun xubir el discu a Spotify, ye porque agora mesmo sabemos que Spotify ta invirtiendo n’armamentu, ta invirtiendo n’intelixencia artificial… bono en coses bien chungues dende’l mio puntu de vista. Yo entiendo que les perres de los artistes nun deberíen de financiar muerte, asina que yo mientres pase eso, prefiero nun formar parte, a lo menos de forma consciente De tolo qu’investigué, los menos malos -que tampoco ye que seyan unos santos, pero en dalgún llau voi tener que xubir la música- ye Bandcamp, onde puede sentise de baldre. Si daquién quier mercar, tamién puede mercalu per ellí, y el discu en físicu va tar en tiendes; pel momentu en Músicasturiana.com, y hasta que nun camuden les coses asina va ser, porque seyamos realistes, pa lo que nos dan estes plataformes en pasta… si esta xente se portara bien con nós, o d’una manera un poco más xusta, bono, pues tragues, pero yo voi siguir siendo igual de probe, tenga’l discu en Spotify o non. Pa lo único que nos val agora mesmu, ye pa que llegue un gañán a mirar cuántes escuches tienes ellí, y si tienes 3 millones moles muncho, y si tienes 500 non moles nada. Pues conozo grupos que tienen 500 y son una puta maraviya. Como estes dinámiques actuales d’esti capitalismu bélicu que tenemos alredor nun me molen nada, prefiero tar un poco equí nesti rinconín.
«La música ye una actividá hedonista, ye pa pasalo bien, pa escapanos un poconín de la realidá, o protestar contra esa realidá, o decir que tamos bien conformes con ello. Ye un mediu d’espresión. Teníemos qu’entendelo como tal. Tampoco vamos idealizar lo qu’hai ellí, porque nun vas ellí a cualquier pueblu y ta tol mundu tocando la gaita o tocando’l vigulín y cantando en gaélicu. Ye una realidá bien distinta»
Y yá pa dir finando, tengo unes entrugues que dan pa muncho, pero precisamente porque dan pa muncho, gustaríame que contestares de manera curtia. Pue ser con una pallabra, pue ser con una frase, con una cita d’un llibru, colo que sía, pa dar respuesta un poco a lo que plantego. ¿Qué ye la música pa ti?
A ver, la música… mira, un clixé d’estos chungos: bendición y condena. Non, ye una parte importante de la mio vida.
Val, y ¿qué ye la tradición?
La tradición, mira… hai quien diz que la tradición ye la presión de grupu d’un montón de peña que yá ta muerta.
Entós, ¿que ye la música tradicional?
La música tradicional, ye la voz del pueblu en realidá, ye la forma d’espresase, por eso munches vegaes… equí voi allargarme. Munches vegaes nun me gusta nada’l términu, pero claro, nun hai otru meyor, tampoco. Nun me gusta nel sentíu de cómo s’usa la palabra tradición y cómo se ta usando tamién nestos tiempos nos que tamos volviendo a estes dinámiques sociopolítiques. Ye la voz del pueblu falando de tolos temes que podíen falar, d’amor, de pena, de desgracies, d’inxusticies
¿Pienses qu’entós eses dos etiquetes, música tradicional, folk, que paez que dixebren dos mundos, son en realidá lo mesmo?
Ye que son lo mesmo. Folk ye pueblu en xermánicu, a la fin, ye d’ónde quieras tú garrar la palabra. Como too se resignifica, si mos ponemos asina yá un poco más pedantucos, nun ye lo mesmo’l folclore como lo entendemos agora, que como s’entendía a finales del XIX, cuando taba la xente teorizando too esto. Agora’l folclore, a lo menos nesti país, yá tien esa connotación de pasar per una serie de filtros, sección femenina… too esti tipu de coses. Entós, cuando se fala de lo folclórico, tu yá nun pienses en Concha ‘i Clara.
Cuando te falen de folclore, muncha xente piensa n’Aires d’Asturies. Caro, nun se puede negar la hestoria tampoco. Ver cómo conflúi tou esto, ye la situación na que tamos. Vinieron los grupos folclóricos, que nos años 80 o 90 yá empezaron a ser conscientes de lo que faíen y de qué queríen faer. Dempués, dexaron de ser grupos folclóricos pa ser grupos d’investigación, etnográfica. Hai xente que lo ta faciendo agora. Ente medies salimos toos nós colos nuesos buzukis y botes de monte faciendo’l folki. De sópitu llega agora toa esta nueva fola cola electrónica, tou esti rollu urbanu, que yá se ve tamién d’otra manera dafechu distinta, porque yá empieza a faer la música xente que son ayenos a tola redolada natural d’esa música. Ye un prisma, son munches perspectives pa cuntar lo mesmo.
Si tuvieres que poner a daquién como un maestru que tuvieres no vital o no musical, una persona importante pa ti a lo llargo de la la to trayectoria, ¿quién pondríes?
Claro, nun podría poner a una persona namás. Lo musical, pues mira, puedo falar de Luis González, flauteru de Xéliba, que sigue siendo súper colega mio y que foi como’l primeru que me punxo en perspectiva too esto.
Él venía tamién de la gaita old school, anque depués pasóse a la flauta, pero d’un rollu de gaiteru tradicional de verdá. De los que llega l’iviernu y xuben la gaita pal horru y tán a lo suyo hasta que vuelve empezar la temporada de fiestes. Tengo deprendío muncho d’él; sigue siendo una referencia. Ye la persona a la que paso los discos enantes d’editalos, que me diga si esto mola, si esto non mola. Evidentemente, la figura d’Igor y d’Elías foron tamién influencia. Hai muncha xente. Agora mesmo trabayo tamién con Santi Galguera pa tou esti tema de deprender a tocar el vigulín pal baille… Hai xente cola que tengo conversaciones bien interesantes. Hai que mirar la llista de la xente cola que toqué n’Asturies, de toos saque daqué. Y del 99%, bonu, que lo sepan. Gracies, xente.
«Tenemos que miranos y aceptanos, porque una cosa que yo deprendí tando pel mundu, y que sigo deprendiendo, ye que somos muncho más interesantes cuando somos nós mesmos que cuando pretendemos ser lo que nun somos; igual que les persones. Yo creo que tenemos un poco la responsabilidá de reconcilianos con esto y faer que’l mesmu pueblu asturianu se reconoza na música que faemos»
Cuando garres la guitarra y tas tocando ¿qué pienses? ¿Qué ye lo que te pasa pela cabeza?
Pues, non sabría decite. Claro, too depende d’en qué parte del procesu toi. Una cosa ye cuando toi trabayando pa daqué, o estudiando, o teniendo que sacar una cantar pa tocar pa daquién o pa mi mesmu. Ye un trabayu más metódicu de que tu tas a la música, al papel, o escuchando y sacando, o escribiendo, o faciendo lo que tengas que faer. De normal, cuando me pongo a trabayar nun tema, daqué que tenga que ser nuevo, yo desconecto y póngome. A la fin llega un momentu qu’entres como un… A ver, nun voi poneme místicu, nun ye qu’entres en trance, pero sí llega un momentu en que flúi tou d’una manera, entós como que yá te va llevando la música… el dexar de pensar. Eso que decía de primeres, cuando falábamos de les influencies, de dexar de pensar. Porque yo empiezo a tocar, y por exemplu quiero facer una jota, entós tas como nuna estructura zarrada, que nel momentu que eso s’automatiza, yá dexes de pensar nello. De sópitu, como que yá la cosa empieza a fluyir, y yá entama a convertise en daqué muncho más flexible.
La última entruga voi facela copiando una idea que me paez mui buena, que fai Alberto Ablanedo nel so podcast ‘Dos grados de separación’, onde entruga al entrevistáu por una recomendación, un llibru, una película, cualesquier cosa que quieras compartir.
Sentir, sentir muncha música, de lo que seya, del estilu que seya. Nun zarrase, de too sácase daqué. Cuanto más raro seya, meyor, porque igual al traviés d’eso somos capaces de ver otres cultures, somos capaces de conocenos meyor, de perdenos el mieu. Porque a la fin, yo creo que la mayor parte de los males del mundu tén ehí porque-yos tenemos mieu. Deprende d’esa cultura, conozlos un poco, y yá vas ver como la to esistencia va ser muncho más rica, muncho meyor. Intenta buscar lo más raro que puedas atopar n’internet, qu’agora lo tienes bien fácil. ¿daquién preguntóse cómo ye la cultura palestina? ¿O daquién preguntóse cómo ye la cultura bereber? ¿O cómo ye la cultura de Mongolia, o de Finlandia, o de los samis, o de quien tu me digas? Entós, conocenos acullá de los clixés yo creo que ye un camín bastante guai pa entendenos y dexar de tar enoxaos.
Suscríbite a les nuestres novedaes
