Sieglu XIX: inventos, meyores víes de comunicación y conservatorios… y a esto súmes-y los nacionalismos, la busca d’identidá de los pueblos… y «zasca», la música tradicional empieza a ser daqué a lo qu’emprestá-y atención en serio. El mundu académicu entamó a respetar la so identidá y a buscar cómo acompañala pa resaltar les sos peculiaridaes, non pa despintales; entró-yos amor polo exótico -orientalismu musical-. Ye l’empiezu de daqué que va siguir medrando y garrando forma nel sieglu XX.
«Nel sieglu XIX el mundu académicu entamó a respetar la so identidá y a buscar cómo acompañala pa resaltar les sos peculiaridaes, non pa despintales»
Dexó a les melodíes ser elles. Beethoven amañó por encargu unes 179 pieces tradicionales, la mayoría son escoceses, galeses ya irlandeses, pero tamién de más llugares, incluyíu España.
Lo interesante: acompañó a les melodíes a la manera de la dómina, pero respetándoles, nun les foi variando vuelta a vuelta.
Esta pieza cunta una hestoria terrible de traición y crueldá per parte de los británicos escontra la Clan escocés de los MacDonald en 1693.
El primer pasu escontra la identidá d’un pueblu. Glinka decatóse de que les formes de componer y escribir música qu’había nun s’afaíen a les melodíes ruses, y tomó la decisión de desenvolver el so propiu llinguaxe.
Cuando estrenó la so ópera Iván Susanin, en 1836, foi como dar «un puñetazu» na mesa de la música académica europea; y foi la llave, amás, por que la corte imperial diera un pasu palantre y promoviera y financiara la busca d’una identidá cultural propia. El zar mesmu camudó-y el nome a esta ópera y púnxo-y: Una vida pol zar.
Destaco una pieza que forma parte de la so producción menor, pero qu’amuesa esi camín d’esploración que yá empezara Chopin dende l’esiliu, porque la mazurka ye una danza polaca, pero nesa dómina, Polonia yera parte del imperiu rusu.
La identidá de la llingua. Creó música que suena a finlandesa ensin usar melodíes tradicionales. Estudió, per un llau, la música tradicional finlandesa en fondura; y, pel otru, la prosodia del finés -les melodíes que crea la llingua falada col so ritmu-; porque una ensin la otra tán coxes. Y sobro estes dos bases fundó la so música, que se convirtió rápido en símbolu de la identidá nacional.
Esta pieza fixo’l camín contrariu, “del auditoriu al chigre”, y agora forma parte de la tradición finlandesa, ye como’l so segundu himnu oficial; cántanla coros, tócanla bandes de metales tradicionales… Pa entender a Sibelius, déxovos a Frigg -nordgrass finlandés-.
Asturies al pianu. Hai que conocer a Pedrell pa entendenos: Felip Pedrell ye’l padre de la musicoloxía española, taba en contra de la «españolada de pandereta y palmes», abogaba pola pluralidá musical ya inventó un métodu científicu para recoyer y clasificar la música tradicional.
Pues resulta qu’Albéniz y Granados escribieron pieces pa pianu con nome asturianu, ensin una melodía tradicional detrás y con ciertu aire andaluz, porque anque los dos fueron alumnos de Pedrell, queríen comer, precisaben vender los sos trabayos nel estranxeru, y dende fora demandaben eso.
Dexo equí una amuesa del trabayu d’Anselmo González del Valle, asturianu, collaborador de Pedrell na recoyida de material musical de la nuesa casa. Nun precisó ganase’l pan y pudo faer lo que quixo, escribió colecciones, rapsodies y pieces de salón; y les xuntes nel so palaciu d’Uviéu son l’orixe de la Sociedá Filarmónica d’Uviéu. En manos de Purita de la Riva, ‘Paxarinos’, la segunda de les pieces, ye una guapura.
Asturies vista dende fora. Rematamos con esta p’acabar a lo grande. Rimsky, un rusu magu de la orquestación, usó’l trabayu de José Inzenga y Castellanos -otru recopilador de tradición musical española-, pa crear el ‘Caprichu español’, y son asturianos l’alborada y el fandangu. Esta suite orquestal foi un éxitu atayante tantu na Rusia de los zares como nel restu d’Europa, y na actualidá forma parte del repertoriu imprescindible de les meyores orquestes del mundu.
Anque Inzenga nun foi tan rigorosu como Pedrell, buscaba los cantares «guapos», sí fixo trabayu de campu y sobretou’l so recopilatoriu Ecos de España tuvo enforma ésitu nel estranxeru, llogrando lo que Pedrell buscaba, alzar el folclor, la música tradicional, al llugar que-y correspuende; y n’esi trabayo y en posteriores, dedicó abondo espaciu a Asturies.
Y tampoco escaezamos d’un detalle importante, nesi sieglu les nueses instituciones nacionales vivíen dando’l llombu a la cultura tradicional, y anguaño, entá queda enforma trabayu.
Llan de Cubel, recupera ya inclúi esta alborada nel so discu IV de 1995, como segunda pieza en ‘Fandangu Putiáu / Alborada Asturiana’, nuna versión maraviyosa, allegre, viva… la que toos conocemos.
Queda bien de xente grande ya importante fora, y ta tou contáu mui percima, asina que quien tenga interés por daqué, que lo dexe en comentarios y respuendo de la meyor manera que pueda.
Nel próximu capítulu voi falar de lo que pasó na primer metá del sieglu XX, una dómina complicada y granible.
Suscríbite a les nuestres novedaes
