Prohibío cantar n’asturianu nestes fiestes

L’añu pasáu Xixón vivió un conflictu por cuenta de les intenciones de los dos ultres qu’entraron nel Ayuntamientu de vetar la música n’asturianu nos eventos festivos de la ciudá. Sicasí, los datos amuesen qu’esta escena tien una presencia residual nes fiestes del país.

«¿Y los artistas asturianos serían tenidos en cuenta aunque elijan el asturiano para sus actuaciones?» «Hombre, si se puede no, pero nunca se sabe». El qu’entruga ye Guillermo Figueroa, periodista d’Onda Cero; la que respuende ye Sara Álvarez Rouco, Vicepresidenta de Vox Asturias, diputada d’esta formación na Xunta Xeneral y, cuando fizo estes declaraciones, llevaba seis días siendo conceyala de Festexos de Xixón; cargu del que la cesaron n’ochobre tres d’amosar otres polémiques intenciones pa col Festival Internacional de Cine de Xixón (FICX). Nesa entrevista del 23 de xunu la política ultra inventó un conflictu que foi ampliamente retrucáu dende munchos sectores. Sicasí, lo qu’ella intentó vetar verbalmente, ye una realidá a lo llargo de gran parte de les programaciones festives del país y ye que son mui poques les conceyalíes de festexos que contraten a artistes de música n’asturianu pa los eventos festivos qu’organicen.

«En San Mateo 2023 hubo más de 40 conciertos y namás una actuación de música n’asturianu; nes avilesines fiestes de San Agustín hubo más de 30 actuaciones y nun hubo nenguna de música n’asturianu»

En San Mateo 2023 hubo más de 40 conciertos entamaos pol Ayuntamientu d’Uviéu y namás una actuación de música n’asturianu: la de Llevólu’l Sumiciu nel programa Otras Músicas de la Plaza’l Paragües. Nes avilesines fiestes de San Agustín hubo más de 30 actuaciones programaes pol Conceyu y nun hubo nenguna de música n’asturianu. Na Semanona 2023 de Xixón heredóse la programación del gobiernu saliente y, dientro de la montonera d’actividades qu’había, la música n’asturianu sonó nunes cites clásiques de l’axenda festiva de la ciudá: XXIII Festival Internacional de Bandes de Gaites Villa de Xixón, XLI Concursu de Canción Asturiana El Comercio, Festival Folclóricu Internacional de Xixón y Desfile Tradicional Día d’Asturies en Xixón. Foi un pasu p’atrás en comparación col añu anterior nel que Los Berrones y Rodrigo Cuevas tocaron nel escenariu de Poniente énte más de 30.000 persones. Amás el gobiernu anterior tamién canceló Al Resve, festival de música n’asturianu que coincidía coles fiestes de Cimavilla. D’esta manera, daqué tienen en común nes ciudaes del país cinco partíos políticos tan estremaos como FSA, PP, IU, Podemos y Ciudadanos: que les programaciones festives que diseñaron en 2023 nun vetaron esplícitamente a los artistes que canten en llingua asturiana, sinón que los ignoraron.

«En Xixón heredóse’l programa del gobiernu anterior, que canceló Al Resve y daba un pasu atrás frente al añu anterior nel que Los Berrones y Rodrigo Cuevas axuntaben a más de 30.000 persones en Poniente»

N’otros conceyos asturianos la organización de les fiestes ye responsabilidá sobre manera de Sociedaes de Festexos y Comisiones de Fiestes, que cunten con sofitu municipal. D’ente los diez conceyos más poblaos namás en Mieres, Castrillón, Corvera y Villaviciosa el diseñu de les fiestes depende directamente del Ayuntamientu. En 2023 nes fiestes de San Xuan de Mieres participaron nomes llocales rellacionaos cola música y folclor n’asturianu como Bandina L’Arrancaera, Prau Llerón, L’Artusu, Ruxidera, Banda Gaites Villa de Mieres, Víctor Manuel, Xaime Arias Trío, delles agrupaciones corales, amás d’un homenaxe al cantador de tonada Juanín de Mieres. Castrillón programó a lo llargo de cuatro díes festivos el XIX Alcuentru de Bandes de Gaites de Castrillón y los conciertos de Skama la Rede y José Manuel Tejedor nel Parque de La Libertad de Piedrasblancas. Les orquestes, la electrónica, el reggaeton y el rap (en castellanu) protagonizaron la l’axenda musical d’unes fiestes de Corvera nes que nun sonó la llingua asturiana; y nes fiestes d’El Portal de Villaviciosa pudo sentise música’l país gracies a les actuaciones de la Banda Gaites Villaviciosa-El Gaitero, Coral Capilla de la Torre, La Tarrancha, Los Gascones, La Xarangana y el Festival Asturiano de Tonada. Per otru llau, los ayuntamientos de Siero, Llangréu y Samartín del Rei Aurelio (los otros tres conceyos más poblaos), deleguen les sos fiestes n’entidaes de festexos y na programación d’esti añu namás hubo un conciertu de La Tarrancha n’El Carmín de La Pola y les actuaciones de Gaiteros del Carbón y la Bandina El Llugarín en San Pedro (La Felguera).

«Equí’l modelu festivu-musical ye’l de les orquestes que percuerren la xeografía d’Asturies. La so hexemonía absoluta tien males consecuencies pa la industria musical asturiana»

Desprecia al to artista llocal

L’exemplu d’estos diez conceyos amuesa que la presencia de la música’l país ye, a nivel xeneral, residual nes programaciones festives. Ye amás una realidá estrapolable a toa Asturies y da datos abondo pa poder afirmar que los artistes que canten n’asturianu nun pueden tocar nes fiestes asturianes. La causa nun son vetos esplícitos como lo qu’intentó facer Vox en Xixón, sinón cenciellamente la ignorancia per gran parte de les Conceyalíes, Sociedaes y Comisiones de Festexos pa cola música fecha nes llingües autóctones. Incluso la música fecha n’Asturies n’otros idiomes ta mui poco presente nos eventos llocales festivos, dándose n’Asturies una situación anómala si la comparamos con otros territorios del Estáu español como Andalucía, País Vascu o Madrid. La famosa frase n’inglés Support your local artist”, n’asturianu podría tornase semánticamente al revés acordies a esta situación: «Desprecia al to artista llocal».

«A esta situación podría dase-y la vuelta si la Conseyería de Cultura marcara unes llines de politiques públiques pa les fiestes asturianes y desendolcara programes específicos pa estos eventos»

Equí el modelu festivu-musical ye bien conocío: la omnipresencia de les mesmes orquestes que van percorriendo tola nuestra xeografía a lo llargo’l branu. Ensin desmerecer el so necesario llabor, la so absoluta hexemonía causa, ente otres coses, dalgo tan grave pa la industria musical asturiana como que gran parte de la sociedá asturiana nun tenga la oportunidá de conocer la música que se fai equí y, polo tanto, nun tenga interés en consumila. Si nun hai demanda, los ingresos d’esta escena van ser muncho menores y esto tamién xenera a la llarga una menor ufierta. Sicasí, Asturies nun tien por qué tener esta maldición enriba y a esta situación podría dase-y la vuelta si dende la propia Conseyería de Cultura se marcaren les llinies a siguir per parte de los distintos Ayuntamientos y por entidaes de festexos pa que la cultura propia tenga un papel relevante nes fiestes asturianes. Anguaño existe Cultura en Rede, que lleva delles propuestes artístiques a una montonera d’escenarios del país; sicasí, les fiestes llocales son les cites que mayor númberu de públicu axunten. Si existiera un programa específicu pa estos eventos -amás de les mentaes directrices de polítiques públiques- podría algamase que los artistes asturianos actúen delantre de muncha más xente; qu’esa xente conoza más la música asturiana y tenga asina más ganes de consumila; y que les comisiones de fiestes cuenten con más apoyu pa desendolcar el so llabor. Unes posibles consecuencies d’esto seríen ameyorar la salú de la escena sonora d’Asturies, ayudar a profesionalizar al sector, fomentar la cultura musical de la población y facer que cualquier políticu se lo piense muncho meyor enantes de dicir públicamente que si pue nun programaría artistes que canten n’asturianu o de tomar en privao una decisión asina. 

XICU ARIZA. Artículu publicáu orixinalmente nel Anuariu de la Música Asturiana 2023

Dexa un comentariu

X