Dixebra, Hevia y José Manuel Tejedor son los cabezaleros de la programación institucional del 8 setiembre

Falten cuatro díes pa que seya’l Día d’Asturies y el Principáu ta acabante d’anunciar la programación de los actos qu’entama anualmente coincidiendo con esta celebración. Esti añu estos actos oficiales van durar del 8 al 10 de setiembre y van tener al conceyu de Llaviana como escenariu. Nél va haber pasucáis de delles agrupaciones, actuaciones de tonada y los conciertos de Fernando Valle Roso y Silvia Moreno col espectáculu Cantares de… y pa neñ@s, Dixebra, José Manuel Tejedor y Hevia. Amás de la música, va haber mercáu tradicional y otres actividaes culturales, deportives y gastronómiques.

La programación musical arranca a les 12 la mañana del vienres 8 col pasucáis del Grupu Folklóricu Virgen del Otero peles cais de La Pola Llaviana. Pela tarde, son los Gaiteros del Carbón quien va desfilar pela villa dende les 16.30h y n’Entrialgo, nos Xardinos del Palacio Valdés, va haber a les 19h un conciertu pa tola familia colos Cantares de… y pa neñ@s qu’interpreten Fernando Valle Roso y Silvia Moreno. El rock n’asturianu protagoniza la nueche d’esti Día d’Asturies cola actuación de Dixebra a les 22h na Plaza’l Conceyu, que va tar precedida pola del grupu de pop español Amistades Peligrosas.

Pal sábadu 9 los soníos de raigañu y distintes bandes de música son les protagonistes. La Banda de Gaites Casa d’Asturies de Guadarrama va desfilar a les 12.30h y 16.30h, la Banda d’Acordiones de Villoria actúa nel Quioscu de la Música a les 13h y la Banda de la Música de Llaviana fai un pasucáis a les 18h. Nel Quioscu de la Música tamién va haber a les 17,30h un conciertu de tonada a cargu de l’Asociación de la Canción y el Folklore Valle del Nalón. Pela nueche al escenariu principal de la Plaza’l Conceyu van xubir los pernomaos gaiteros José Manuel Tejedor a les 20h y Hevia a les 22h. La programación remata’l domingu 10 con otru pasucáis de la Banda de la Música de Llaviana (12h) y más tonada nel Quioscu de la Música cola participación de l’Asociación d’Intérpretes de Canción Asturiana (AICA).

Mercar discos de los grupos qu’actúen