Yá ta anunciada la programación musical completa d’un nuevu festival asturianu, el Trasiegu Fest. Del 18 al 24 de setiembre Bimenes, Cabranes, Colunga y Sariegu van acoyer esti eventu qu’axunta teatru, gastronomía, charres, talleres, lliteratura, danza y música con un puntu d’alcuentru: amosar la bayura de la cultura sidrera. Esta cultura nun se podría entender ensin la música y por eso’l festival da-y protagonismu a la música n’asturianu y entama dellos conciertos pal vienres 22 y sábadu 23 de setiembre na Plaza’l Conceyu de Santolaya de Cabranes y pal domingu 24 na Casa de la Cultura de Santuyano de Bimenes.
La programación musical arranca la nueche del vienres 22 a les 21h con una Nueche en Mayanza entamada pol Grupu Folclóricu Trebeyu en Santolaya de Cabranes. Al día siguiente, la bandina popular Los Gascones va actuar peles cais de la capital de Cabranes pa llueu dar pasu a un conciertu na plaza de Santolaya con más d’ocho hores de música n’asturianu. Nél va sonar el pop-rock de Luis Núñez y Los Folganzanes, la música tradicional fusionada d’Algaire, el mecigayu-ska de La Tarrancha y la electrónica de raigañu de Llevólu’l Sumiciu.
La xornada del domingu 24 setiembre va protagonizala la música pa tola familia y treslládase a la Casa de la Cultura de Santuyano, nel Conceyu Bimenes. Ehí ye onde van actuar pela mañana el dúu pop Mestura y el multiinstrumentista David Varela col so espectátculu Restolando. Toles actividaes son de baldre y nos próximos díes la organización -VerAsturies.com cola collaboración de Cuatro Gotes Producciones y el sofitu d’estos cuatro conceyos de la Comarca la Sidra, amás del Plan de Recuperación Tresformación y Resiliencia-, va dar a conocer tolos horarios y la programación completa..
Suscríbite a les nuestres novedaes
