Dixebra preestrenen “Ente la niebla” esti xueves na canal de YouTube de musicasturiana.com
El vienres 25 de marzu va asoleyar en toles plataformes dixitales “Ente la niebla“, el primer adelantu del discu nuevu de Dixebra que lleva’l mesmu títulu. Sicasí, un día enantes, el xueves 24 a les 22.00h, Musicasturiana.com va estrenar n’esclusiva na so canal de YouTube esti single de la banda más veterana del rock asturianu.
“Ente la niebla” ye un cantar mui dixebriegu, con una base rítmica potente sobre la que se pue sentir soníos como’l rock, funk, folk. La lletra ye toa una declaración d’intenciones venceyada al conceptu qu’arrodia esti llibru-CD, la reflexón sobre lo que fueron y son el movimientu obreru y les clases populares asturianes del últimu sieglu. «Yá nun somos lo que fuimos; sicasí, queda esi recuerdu, esa inercia, y igual que’l restu de la clas trabayadora en cualesquier sitiu, una fuercia que se manifiesta de manera intermitente, colos sos fluxos y refluxos, como la marea que xube y baxa, como’l Guadiana qu’aflúi a la vista o escuéndese pero aflúi igualmente», diz el testu qu’acompaña al cantar nel llibru, con esi mensaxe de señaldá y enfotu a la par.
“Ente la niebla” asoleya’l vienres 25 de marzu en toles plataformes dixitales y va ser el primer de los dos adelantos qu’hai previstos qu’asoleyen enantes del llanzamientu d’esti llibru-CD el próximu 22 d’abril. El trabayu yá pue acutase en musicasturiana.com pa que quien lu merque lu reciba na so dirección el mesmu día del llanzamientu. Amás, mentanto dure la preventa hai merchandising de Dixebra a preciu rebaxáu y tolos pidíos van llevar de regalu una postal con testu manuscritu y firmada colectivamente pol grupu.
‘Ente la niebla’, va ser la obra más ambiciosa y personal de Dixebra, un trabayu conceptual alredor de la historia, la llucha y la significación del movimientu obreru y les clases populares asturianes. Nesti llibru-CD collaboren periodistes, escritores, profesores, historiadores, ilustradores, dibuxantes… que, coles sos creaciones, reflexonen sobre’l pasáu, el presente y el futuru de la clas obrera asturiana. Nel terrén musical, el discu ta formáu por venti cantares nos que van dexase sentir composiciones d’aire distintu ente sí: rock, reggae, ska, folk, funk, metal… nuna bayura de soníos que sigue la filosofía musical dixebriega.
