La Banda Gaites Llariegu cellebra’l so 25 aniversariu el 2 d’abril con un conciertu mui especial

Llariegu lleva 25 años trabayando pol patrimoniu cultural asturianu y el sábadu 2 d’abril van cellebralo como se merez. El Polideportivu de Sariegu va acoyer un espectáculu nel que la banda va interpretar repertoriu nuevu, que va grabase n’audio y videu, que va tener abondes y destacaes collaboraciones y nel que va vese una continuación y evolución del anterior trabayu, l’aclamáu ‘Llariegu 100% Directo‘.

«Trátase de facer música y melodíes asturianes, pero fusionaes con otros estilos y xéneros musicales», comenten dende la banda. Pa ello cuenten cola producción musical y los teclaos de Javi Rubio, del que destaquen que «siempre consigue qu’estes dos estayes s’entemezan a la perfección», y con una banda formada por Jorge Cambareli a la batería, Juan Carlos Vega al baxu, Juan Diego Yera a la guitarra y un tríu de metal integráu por Miguel Herrero a la trompeta, Tino Cuesta al saxu y Toño Gómez al trombón. Destaquen amás les collaboraciones d’Héctor Braga a la zanfona y de los grupos de baille de Fitoria y Del Ventolín xunto a les sos pandereteres dirixíes por Laura Ruiz.

Con una entrada a 10 euros que se pue mercar escribiendo a entradasllariegu@gmail.com o en dellos sitios, a les 19.30h del sábadu 2 van abrise les puertes d’un espectáculu que va arrancar a les 20.30h. La escenografía cuenta y dende la banda aseguren que «el polideportivu de Sariegu va tar acondicionáu pa la ocasión, faciendo que de puertes pa dientro la xente nun va saber si ta nun polideportivu o nun teatru, porque la acústica y estética van ser asemeyaes». Amás, va haber una barra pa que’l públicu puea tomar daqué enantes y dempués de l’actuación.

Quien nun puea asistir, va poder ver parte d’esti espectáculu más palantre en formatu audiovisual. Como yá ficieran con ‘Llariegu 100% Directo’ -del que van tocar tamién dalgún tema -, «el conciertu va grabase n’audio y video pa llueu editar dellos de los temes y publicalos xunto con un segundu trabayu discográficu qu’asoleyará l’añu que vien, coincidiendo cola finalización de la xira d’esti 25 Aniversariu», despliquen dende la banda gaites.

Un cuartu de sieglu

«25 años dan pa muncho y sobre too cuando foron tantos los momentos vivíos», opinen dende Llariegu. Pa la banda ye un arguyu «representar y llevar el nome y la música d’Asturies a nivel nacional y internacional» y destaquen cómo fueron «creciendo y evolucionando» y lo «arriquecedora» de la trayectoria nel ámbitu musical y personal. «Son munches les persones que conoces nel camín y dalgunes pasen a ser como de la to familia porque al final vives con elles grandes esperiencies, momentos inolvidables y vivencies que namás la música pue dar». La del próximu sábadu 2 d’abril festexando un cuartu de sieglu, de xuru que va ser otra d’elles.

Mercar discos de gaita tienda online