«”Dixo miou padre” fala d’aprender, d’aceptar ya de buscar cada unu’l so camín»
Esti domingu 12 de payares a les 19h tien llugar nel Teatru La Llaboral de Xixón la gala final del XV Premiu Camaretá al Meyor Cantar, l’únicu premiu institucional qu’existe anguaño pa da-y reconocimientu a la música fecha n’asturianu o gallego-asturianu. Marisa Valle Roso con “Tonada“, José Manuel Tejedor con “Les tos nales“, Vero Rubio con “Dixo miou padre“ y Alienda con “Zanca de cabra“, son los cuatro grupos y cantares nominaos nesta edición. Dende musicasturiana.com vamos falar esta selmana cada día con ún de los artistes nominaos pa conocer por qué escoyeron esi tema, si tienen preparao daqué especial pa la final y qué supón participar nesti certame.
Siguimos el cuestionariu con Vero Rubio, multiinstrumentista que toca’l pianu, la trompeta, la trompa y el bodhram. La so carrera desenvuélvese ente’l mundu de la música clásica, onde tuvo la oportunidá de tocar con orquestes como la Orquesta Sinfónica de Barcelona y Nacional de Catalunya (O.B.C.), y el del jazz. Anguaño, toca en dellos grupos de distintos estilos (folk, rock, improvisación llibre, jazz…): Orquesta Céltica Asturiana, Sonámbulos, Improviso… Amás compaxina esti llabor como instrumentista cola composición y producción de la so música de manera independiente.
¿Qué supón pa ti la nominación nesti premiu y qué supondría ganalu?
La nominación yá ía un premiu. Tar el domingo compartiendo escenariu colos músicus ya músicas que van tar, un regalo ya un honor. Ya ganalu, nun me faigo una idea, tou fixa que’l honor ya l’allegría diban ser tan grandes que diba costame pasalo creer… ya diba ser preciosu…
¿Por qué escoyisti esti cantar pa concursar?
Escoyila porque ía la canción qu’entama’l miou proyectu “Vou”. Fala d’aprender, d’aceptar ya de buscar cada unu’l so camín, que vien ser l’alma, la idea qu’impregna “Vou” enteru. Ya fízome muito bien escribila, cantala… ayudóume muito, tengo muito muito cariñu por el.la.
¿Tenéis daqué especial preparao pa l’actuación del domingu?
Taré nel escenariu rodeada xente que quiero, faciendo una canción que quiero ya faeme bien… vei notase tuodo ese cariñu. Ya tamién vei haber una cousina, una guindina nel pastel…
