«”Tonada” ye un llamamientu a conocer y cuidar la nuestra cultura, con amor y llibertá»
Esti domingu 12 de payares a les 19h tien llugar nel Teatru La Llaboral de Xixón la gala final del XV Premiu Camaretá al Meyor Cantar, l’únicu premiu institucional qu’existe anguaño pa da-y reconocimientu a la música fecha n’asturianu o gallego-asturianu. Marisa Valle Roso con “Tonada“, José Manuel Tejedor con “Les tos nales“, Vero Rubio con “Dixo miou padre“ y Alienda con “Zanca de cabra“, son los cuatro grupos y cantares nominaos nesta edición. Dende musicasturiana.com vamos falar esta selmana cada día con ún de los artistes nominaos pa conocer por qué escoyeron esi tema, si tienen preparao daqué especial pa la final y qué supón participar nesti certame.
Entamamos el cuestionariu con Marisa Valle Roso, intérprete llangreana que lleva dedicada a la música dende la infancia y dende mui pronto destacó como una de les voces renovadores de la tonada, con una trayectoria qu’incluye dellos trabayos discográficos y xires.
¿Qué supón pa ti la nominación nesti premiu y qué supondría ganalu?
Yá ye un premiu’l tar nominada y poder participar nesta gala col restu de finalistes. Ganalu faeríame especial ilusión siendo con “Tonada” y lo que pa mí representa.
¿Por qué escoyisti esti cantar pa concursar?
Porque “Tonada” ye una reivindicación propia a la vez qu’un homenaxe al mesmu xéneru. Un llamamientu a conocer y cuidar la nuestra cultura, con amor y llibertá, ensin censures, nin llimitaciones. Traer el folclore al momentu nel que tamos, falando de lo que queremos falar. Llingua y asturianada, que formen parte de la nuestra identidá cultural y xuntes, dende una interpretación y un sentimientu actual, paecíame una bona combinación pa esti premiu.
¿Tenéis daqué especial preparao pa l’actuación del domingu?
La interpretación que pueda da-y na gala pola maxa del momentu.
