Yá queda menos pa que s’entame’l II CachuFest. Los díes 19, 20 y 21 de setiembre l’aldea de Trabáu (Degaña) acueye esti eventu que tien como seña d’identidá’l «territoriu, música, cultura y tradición», como presenten dende la organización. Ente les primeres confirmaciones artístiques asturianes alcuéntrense la formación moza de música tradicional Abéu, el dúu d’electrónica de raigañu Llevólu’l Sumiciu, la banda de música celta Guieldu y el tríu folk Picarós.
Amás, el CachuFest apuesta polos sones de raigañu d’otros territorios y asina ye como tamién va actuar el tríu gallegu de música tradicional y electrónica Alana; la formación madrileña de folk Cuélebre y Dulzaro, proyectu qu’entemez el folclor castellanu colos sones contemporáneos y electrónicos.
Tovía queden más artistes y otres actividaes por anunciar y los abonos yá tán a la venta por un preciu estándar de 34,90 €; 24,90 € pa residentes en Degaña y Ibias; y 14,90 € pa menores de 18 años. La entrada ye de baldre pa menores de 12 años pa esti eventu entamáu por Espacio Tormaleo en collaboración con La Guarida del Cunqueiru y Il Truganal y l’apoyu de la Conseyería de Cultura, Política Llingüística y Deporte y la Comisión Europea.
Na semeya, actuación de Guieldu na anterior edición.
Suscríbite a les nuestres novedaes
