El discu en directo de Felpeyu ‘Live Overseas’ yá ta en toles plataformes dixitales
Nel añu 2000 Felpeyu fixeron la so primer xira per Australia y, a la vuelta, grabaron nel chigre Miudiño n’Ourense el so únicu discu en directo hasta la fecha, qu’amás ye ún de los pocos trabayos en vivo de la escena folk asturiana. ‘Live Overseas’ «ye un trabayu pensáu pa la xira de 2001 y pal públicu australianu» -como desplica Ruma Barbero-, y namás asoleyó nuna edición llimitada distribuyía sobre manera per Australia, pero dende güei yá ta en Spotify y en toles demás plataformes dixitales.
Asina presenta’l míticu grupu folk esti históricu trabayu:
«El 2000 foi l’añu de la nuestra primer xira n’Australia, y una de les esperiencies más guapes de FELPEYU. Sentímonos cautivaos pol país y la so xente, y, dende l’escenariu, esperimentamos momentos de muncha intensidá nel contactu ente’l públicu y el grupu. Probablemente depués d’ún d’esos conciertos, dímonos cuenta de lo guapo que sedría rexistrar esos momentos nuna grabación. Entós salió una nueva xira, y esa vez decidimos que queríemos tener daqué prestoso pa ufiertar al públicu, daqué que caltuviera esactamente lo que la xente esperaba sentir nun concierto de FELPEYU.
El repertoriu d’esti discu reflexa con ciñu lo que vinimos tocando na pasada xira: sets y canciones de los nuestros trabayos FELPEYU y Tierra, más un par d’arranchos nuevos. La Marcha de Antón El Neñu, una marcha mui guapa qu’a Lisardo, Ígor y Xuan-yos dio por tocar nel Port Fairy Folk Festival pa enseñar cómo suenen les marches tradicionales asturianes; el públicu acoyóla con tantu entusiasmu que siguimos tocándola, y convirtióse nuna de les pieces más aclamaes na xira. Y D’Equí A Somió, un cantar bien célebre del conceyu Xixón, que cunta la hestoria d’una neña que, pa enguedeyar al mozu que-y presta, entama a dicí-y toles coses que’l so pa incluyiría na dote si él quixera casase con ella; como ye de recibu, la lletra ta en xéneru femenín y, yá que por desgracia nun hai muyeres nel grupu, Carlos y Ígor foron a repartir la voz principal pa rise un puquiñín.
Esta grabación ta dedicada a tolos queríos amigos qu’atopamos n’Australia, que mos ayudaron nuna xira de tales proporciones; y, cómo non, al públicu australianu, probablemente’l más caldiu qu’enxamás atopamos. Por toos vosotros, tamos naguando por tocar otra vez Live Overseas».
