Entrevista a Alan Stivell n’Asturies en 1980
El documentu audiovisual que rescatamos pertenez al archivu de la Productora de Programes del Principáu d’Asturies (PRODA); trátase d’una entrevista qu’emitió’l Centro Territorial de TVE n’Asturies nel espaciu Panorama Regional. Ta fecha nel camerín habilitáu na Feria de Muestres, enantes de la so actuación naquella II Muestra Internacional de Música Celta, nella fala del celtismu en xeneral y d’otres cuestiones rellacionaes cola so música y con Asturies.
El bretón Alan Stivell ye un intérprete fundamental de la música popular del sieglu XX, cuando a principios de la década de los años 70 formula la so propuesta d’una nueva música celta, enraigonada na tradición pero asitiada nel presente que posibilite’l so futuru. Nesti sen, podemos consideralu’l verdaderu ideólogu y arquitectu de lo qu’entendemos por Música Celta anguaño, un términu que pa él va muncho más allá d’una simplaya etiqueta comercial y que tresciende lo puramente musical.
Stivell fai compatible la idea de ser ciudadanu del mundu con ser conscientemente bretón, ensin renegar de la so identidá, venceyando la so propuesta musical y ideolóxica a la política nun sentíu ampliu. Pa él el centru del mundu ye Bretaña, como pa un/a asturianu/a tien que ser Asturies; ésa ye la nuestra manera de tar nel conxuntu de la comunidá humana.
N’Asturies, la figura d’esti bretón universal, tuvo una influyencia pergrande nel espardimientu del celtismu, sicasí, musicalmente onde meyor puede apreciase la so importancia ente la nuestra escena más que nel folk ye nel Rock Astur. Les sos visites al nuestru país foron namás dos, onde pudimos apreciar el so conceptu d‘espectáculu, que dixebraba en dos estayes perbién definíes. Una primera él namás acompañáu pol arpa, onde interpretaba cantares y melodíes tradicionales coles que lliberar l’espíritu, pa pasar darréu a la segunda, onde cola so banda al completu y un españíu de soníos folk-rock afalaba a lliberar el cuerpu. La primera d’aquelles actuaciones desenvolvióse un 27 d’abril de 1980, nel marcu de la II Muestra Internacional de Música Celta (la primera entamárase l’añu anterior cola presencia del gaiteru Luis de Parres y los grupos Asturcón y Gwendal), que tenía como escenariu’l Pabellón Central de la Feria de Muestres de Xixón, na que tamién actuaron el gaiteru Luis d’Arnizo, el grupu Güercu y el cantautor Carlos Rubiera. La segunda y última vez que pudimos ver a Stivell n’Asturies foi na Nueche Celta entamada poles fiestes patronales d’Uviéu, na Plaza de la Catedral un 13 de setiembre de 1986. La respuesta del públicu nes dos ocasiones foi multitudinaria y la conexón col músicu bretón daqué que recuerden tolos/es que tuvieron nelles.
