En tres meses va celebrase’l III Semando Fest, festival de música moza n’asturianu qu’entama Musicasturiana.com y Ixuxú Cultura. Por eso dende la organización yá entamen a anunciar dellos de los detalles d’esti eventu que va axuntar el 8 de febreru en Lata de Zinc (Uviéu) a cuatro proyectos d’estremaos estimos musicales y con componentes menores de 35 años. La primer novedá ye la presentar el logotipu d’esta edición nueva y a la so autora, Paula Suárez «Surimi«.
Nacida en Xixón en 1990 -anque emigrada dende hai una década a Madrid-, Paula Suárez estudió ilustración y dende va años ye tatuadora baxo’l nomatu de «Surimi«. El so estilu mui personal; el que tatúe davezu motivos rellacionaos con Asturies; la calidá de la so obra; y el so venceyu cola música -forma parte del grupu shoegaze Ice Haven-; son dalgunes de les razones pa que la organización la escoyera como responsable de la identidá visual d’esti III Semando Fest.
D’otra banda, yá ta too zarrao pa esta tercera edición del festival: grupos, cartelería, realización audiovisual y presentadores. Nes próximes selmanes van dir anunciándose los nomes de los distintos axentes implicaos nun eventu que busca ser más qu’un conciertu y por eso tien una filosofía caracterizada por puxar pol relevu xeneracional na música asturiana; por ufrir un festival con un formatu orixinal qu’entemeza aspectos d’una gala colos d’una actuación; que reivindica les sales de conciertos como un espaciu afayadizu pal exposigue de la música de raigañu; y qu’apuesta por da-y oportunidaes a les y los creadores xóvenes.
Ediciones anteriores
La iniciativa nació en 2023 y nella participaron el dúu d’asturianada Alicia Villanueva y Luis Álvarez Pola; el tríu de folk de cámara Loína; les pandereteres Algaire y el dúu d’electrónica de raigañu Llevólu’l Sumiciu. Cecilia Díaz foi l’autora del cartelu y la identidá visual, mientres que les semeyes y el videu resume del eventu fueron obra de Lucía Garó. Yedra Riesgo y Raúl Alonso -responsables del programa radiofónicu Héroes Ensin Nome– foron los encargaos de presentar l’eventu.
En 2024 xubieron al escenariu Sandra Álvarez y Noemí González col so espectáculu de poesía feminista y tonada -qu’anguaño preséntase como Milfueyes-; Mostru l’Horru col so rap combativu; la banda de folk celta Guieldu y el grupu de punk-rock Ochobre. Beatriz Menéndez -alter ego de Made in Chigre– foi la responsable de tola parte gráfica y Leticia Cernuda de les semeyes y del videu. Héroes Ensin Nome repitieron como presentadores.
Suscríbite a les nuestres novedaes
