Ayeri martes 5 de payares la sala de prensa de la sede de LNE d’Uviéu acoyó la presentación de Mysterium, el trabayu discográficu col que Noelia Rodiles y la OFIL reivindiquen la figura del compositor avilesín Julián Orbón (1925-1991). Trátase d’un discu que recupera una de les obres concertantes d’Orbón, la «Partita nº4», grabada pola pianista y la orquesta baxo la dirección de Lucas Macías, y qu’inclúi, tamién, la grabación de «Cloches» de Manuel Martínez Burgos, inspirada nes campanes de la catedral d’Uviéu. Sicasí, ayeri Pilar Rubiera, Rodiles, Martínez Burgos y Macías comentaron les claves del so llabor y ficieron delles peticiones a la escena de la música clásica n’Asturies.
Dempués de la proyección d’un videu resume de les xornaes de grabación del discu nel que les persones asistentes pudieron sentir delles notes de les dos obres en cuestión, la perconocía pianista Noelia Rodiles -qu’anguaño combina la so actividá como concertista cola docencia nel Conservatorio Superior de Música de Aragón-, narró l’orixe del so venceyu cola obra de Julián Orbón. Gracies a una Beca Leonardo d’Investigación Científica y Creación Artística impulsada pola Fundación BBVA pudo averase a la figura del compositor, avilesín como ella, y estudiar los manuscritos d’esta «Partita nº4» pa pianu y orquesta, allugaos nel archivu de la Universidá d’Indiana (EEXX). Desplicó la historia de la obra, destacando’l so estrenu nos años 80 n’EEXX con Eduardo Mata y l’escaezu que sufrió dende entós, mesmo’l compositor, malpenes conocíu nel país anque dea nome al conservatoriu d’Avilés. Pa la pianista trátase d’una «obra fundamental del repertoriu» que tien de recuperase.
La presentación remató con delles reivindicaciones de les cuatro persones que la encabezaron en rellación a la educación musical del Estáu, con incidencia especial nel casu asturianu. Rubiera, Rodiles, Martínez Burgos -que ye Catedráticu de Composición nel CONSMUPA- y Macías coincidieron en que nun ye posible una educación musical pública de calidá nos conservatorios si nun s’algama un escenariu nel que les docentes puedan, amás de poner clase, investigar y xubise al escenariu, ye dicir, que tean n’activo. La situación llexislativa vixente n’Asturies nun lo permite. Amás, refugaron la brecha de dotaciones, instalaciones y medios qu’esiste pa colos centros privaos d’otros territorios -como Musikene n’Euskadi, ESMUC en Catalunya o la Escuela Superior de Música Reina Sofía de Madrid-, la falta d’integración de la música nes escueles dende edaes tempranes, y la necesidá de facer más accesibles económicamente les opciones culturales venceyaes a la música clásica n’Asturies pa la mocedá -como les funciones d’ópera o les xorrnaes de conciertos del auditoriu d’Uviéu-.
Suscríbite a les nuestres novedaes
