La Esplanada del Parque Fluvial de Viesques va acoyer esti fin de selmana la tercer edición del Xixón Folk, eventu entamáu pola Banda Gaites Saxum qu’axunta música en vivo, mercáu tradicional, talleres, exhibiciones d’oficios, espectáculos pa la reciella, xuegos tradicionales y gastronomía. Too ello cola participación de más de quince formaciones que van ufrir actuaciones de música tradicional asturiana y rock astur.
Los sones de raigañu van entamar a sentise’l vienres 5 a les siete la tarde cuando la Banda Gaites Saxum faiga un pasacáis mitolóxicu per parte’l barriu xixonés de Viesques. A les 20.30h el Grupu Folklóricu Trebeyu va poner un taller de baille tradicional que va calecer l’ambiente pa la Nueche en Danza. Esta arranca a les 21.30h y nella participen Pandereteres de Trebeyu, Grupu Etnográficu L’Oriente, Soi Panderetera y Los del Prau Chanu; amás, va haber escenariu llibre pa quien quiera sumase a l’actividá.
La programación musical del sábadu 6 arranca a les 13.30h con una sesión vermú amenizada pola Bandina Los Trimendos. Pela tarde, hai un pasacáis de bandes de gaites a les 17.30h que fai d’anticipu del III Alcuentru de Bandes de Gaites Saxum nel que participen, a les 18h, Banda Gaites Castrillón, Banda Gaites Conceyu Llangréu, Grupu Folklóricu Prau Llerón, Banda Gaites Villaviciosa-El Gaitero, amás de la formación anfitriona, Banda Gaites Saxum. La bandina popular Los Gascones toca a les 21.30h enantes de dar pasu, a les 23h, al conciertu de la mítica banda de rock astur Dixebra. La nueche zárrala DJ La Güeriata, pinchadiscos qu’esbilla música asturiana con otros sones contemporáneos internacionales.
El festival zarra’l domingu 7 con más música’l país. El Grupu Folklóricu La Alegría actúa a les 12.30h; la Bandina Los Trimendos repite esti día a les 13.30h pal vermú; Carlos Velasco & Chino El Indio faen un «tardeo folk» a les 16h y el grupu Rollu Folk pon el ramu a los conciertos d’esti festival que con esta tercer edición consolídase dientro’l calendariu xixonés d’eventos de música asturiana.
Na semeya, Los Gascones na edición de 2025.
Suscríbite a les nuestres novedaes
