Del 3 al 5 de xunetu el pueblu de Zarréu, en Degaña, acueye la tercer edición del Zarréu Fest, la «Sestaferia cultural nel monte» entamada por AMA Asturies qu’axunta conciertos d’estremaos estilos y otres actividaes culturales a lo llargo de trés díes nun entornu únicu. Too ello con entrada y zona d’acampada llibre. Dende la organización del festival tán anunciando estos díes nes sos redes sociales los primeros nomes de los artistes que van actuar; les formaciones folk Felpeyu y Alienda van tocar axuntando veteranía y mocedá enriba l’escenariu.
«El grupu que ḷḷeva décadas convirtiendo las nueites de conciertos folk en pura maxa. ¿Qué dicir d’esti grupu tan míticu, d’esta banda sonora cola que vivimos mil aventuras, amores, desamores, gayolas… mil historias que cuasi nun cuechen nuna vida? Felpeyu yía patrimoniu d’Asturies ya de las nuestras vidas compartidas. Yía maxa, compromisu, tradición ya innovación. Yía’l grupu que te vei faer cantar a voz en gritu ‘Los fayeos de mayu’ ya emocionate con ‘Ferreirín’ outra vuelta», publicó l’Asamblea Moza d’Asturies pa presentar a esta veterana formación.
D’Alienda destacaron que «el so estilu foi nomáu como ‘power folk’ y entemez música ya instrumentos tradicionales asturianos con elementos d’otros estilos. Con dos trabayos d’estudiu asoleyaos, tienen fecho conciertos en dalgunos de los festivales más importantes del circuitu folk, como’l Festival Interceltique de Lorient o el Festival do Mondo Celta d’Ortigueira, ente munchos otros. En 2025 asoleyaron el so últimu single ‘El rescamplíu’, que foi escoyíu como banda sonora del XVIII Festival Internacional de la Gaita, en Villaviciosa. Muitas ganas!!!!!!».
Próximamente va siguir anunciando más bandes esti festival nel qu’actuaron n’ediciones anteriores grupos como Dixebra, Algaire, Skama la Rede, Corquiéu, Dixebra, Herbamora o 6 Riales.
Suscríbite a les nuestres novedaes
