Del 13 al 15 d’ochobre Candás va acoyer la segunda edición del Reguerada Fest, feria d’empreses, lliteratura, música, artes visuales y escéniques y gastronomía qu’entama la Viceconseyería de Cultura, Política Llingüística y Deporte cola coordinación del músicu y escritor Xaime Martínez. Dientro de la programación va haber espaciu pa la música’l país, colos conciertos de Nacho Vegas, Alicia Álvarez y Algaire; l’actuación de la Banda Gaites Candás, el pasacais del GBT San Félix; la presentación del discu Semando Son y la participación de musicasturiana.com con un stand nel mercáu d’empreses
La Fábrica d’Ortiz va ser l’escenariu de les actividaes rellacionaes cola música asturiana del Reguerada Fest. A les 17h del vienres 13 la Banda Gaites de Candás inaugura nesti espaciu el mercáu nel que van participar delles empreses que trabayen n’asturianu y nel que musicasturiana.com va tar presente col so catálogu de CDs, vinilos y merchandising. Esi mesmu día a les 20.30h va actuar el cantautor Nacho Vegas, interpretando’l so espectáculu Cantares dende’l pie.
La música pa tola familia abre la programación del sábadu cola actuación d’Alicia Álvarez, que va tocar los cantares del so últimu discu Kikirikikí. Pela tarde va ser la presentación oficial de Semando Son, compilatoriu de música moza n’asturianu. A les 18.45h Xicu Ariza, responsable de musicasturiana.com y de la edición d’esi CD, Alicia Villanueva, Luis Álvarez Pola y componentes de Loína, Algaire y Llevólu’l Sumiciu van falar d’esti discu, del Semando Fest y del relevu xeneracional na música n’asturianu. Llueu van tar nel stand de musicasturiana.com pa firmar los discos físicos que’l públicu quiera mercar ellí.
Algaire y San Félix
La programación de música’l país complétase con un conciertu d’Algaire‘l sábadu a les 20:30h y un pasacais per Candás del Grupu de Baille Tradicional San Félix, agrupación folclórica llocal qu’esti añu ta festexando’l so 40 aniversariu.
Suscríbite a les nuestres novedaes
