Un TFM sobre música y identidá nel Centru Asturianu de Madrid llogra la máxima calificación

Hai unos díes el musicólogu y gaiteru Gonzalo Fernández Ruiz de Zuazo (Madrid, 1994), defendía na Universidad Complutense un Trabayu de Fin de Máster tituláu El Centro Asturiano de Madrid (1881-). Práctica musical y expresiones identitarias, col qu’algamaba la calificación de sobresaliente. Nél faise una revisión histórica sobre la práctica musical y les espresiones de la identidá asturiana na institución madrilana. El testu fai un estudiu de les formaciones musicales y de los y les intérpretes surdíos nel Centru Asturianu de Madrid, asina como una esploración sobre la influyencia de la música nes práctiques de sociabilidá realizaes nél. Trátase d’un trabayu novedosu sobre la importancia de la música como tresmisora y conservadora de la identidá na diáspora asturiana, nesti casu centrada nes actividaes rellacionaes con ello nel organismu madrilanu.

El Centru Asturianu de Madrid fundóse nel añu 1881 y anguaño ye la institución d’esi calter -xuntanza d’emigrantes- más antigua del mundu. Yá dende’l primer momentu, como atestigua l’autor d’esti TFM, puxó porque nun francieren los llazos afectivos y identitarios d’aquellos y aquelles que tuvieron qu’emigrar cola so tierra d’orixe. Un llabor que continúa güei con iniciatives como l’Agrupación Folclórica «L’Alborá», el Coru «Ecos» (especializáu en polifonía asturiana) o la Banda de Gaites «El Centru».

Gonzalo Fernández Ruiz de Zuazo rellaciónase cola música asturiana yá dende bien neñu, cuando con namás tres años principia a tocar el tambor asturianu col güelu, Salvador Fernández, qu’acompañaba a gaiteros como Rogelio Fernández o Manolo Cano, d’esta manera súrde-y tamién l’interés pola gaita. Les primeres clases del instrumentu recíbeles con doce años de la mano de Jorge Lazo; yá formáu na técnica del instrumentu escomienza una carrera venceyáu a él, que lu fai participar en concursos, acompañar a cantantes de tonada o impartir clases. Anguaño, ye’l director de la Banda de Gaites «El Centru». Anteriormente a esti TFM, fixera un Trabayu de Fin de Grau tituláu Asturianía en la diáspora. La Gaita Asturiana en Madrid desde los años 70 del S. XX hasta la actualidad, algamando tamién la calificación de sobresaliente.