El rock astur garra protagonismu nel X Maízu Rock

Los próximos vienres 5 y sábadu 6 de xunetu la llocalidá d’e canguesa d’Intriago, en Cangues d’Onís, acueye la décima edición del Maízu Rock, una de les feches imprescindibles nel calendariu de toles persones siguidores de los soníos punk y rock. Esti festival entamáu pola Asociación Cultural Sintir siempre amosó’l so compromisu cola llingua asturiana y vien programando actuaciones de bandes que canten nel idioma autóctonu del país; sicasí, esti 2024 dan un pasu más al protagonizar el rock n’asturianu tolos conciertos del vienres.

La banda decana del rock n’asturianu Dixebra, la formación punk-ska Skama la Rede que s’alcuentra anguaño festexando’l so venti aniversariu, el veteranu grupu de mecigayu-ska La Tarrancha y Ochobre, banda punk-folk heredera del camín andáu por toos estos proyectos de rock astur, son les cuatro formaciones que van tocar la primer nueche d’esti festival. Amás, el sábadu 6 tamién va haber presencia de grupos que tienen dalgún cantar n’asturianu como’l raperu xixonés Doris Escarlata, qu’actúa en sesión vermú, o la formación piloñesa de punk Karank. Amás d’ellos, van actuar otros grupos de fuera d’Asturies. Tanto la entrada como l’acampada pal Maízu Rock son de baldre.

Na semeya, actuación d’Ochobre nel Kuivi PopUp 2022. Autoría de Pablo Fernández.

Dexa un comentariu

X