El Grupu Etnográficu L’Oriente de la Asociación Cultural Llacín, xunto al Ayuntamientu de Llanes y cola collaboración de la Conseyería de Cultura, Política Llingüística y Deporte entamen un nuevu proyectu cultural en Llanes: La X.O.T.A., Xira L’Oriente Trad Alcuentru. Trátase d’un festival de música y baille que, inspiráu na tradición oral, va acoyer dende les manifestaciones más próximes a la tresmisión hasta otres más creatives y vanguardistes. Conciertos, baille, folixa y talleres son dalgunes de les actividaes que van desendolcase los díes 7 y 8 de xunu con entrada llibre.
El vienres 7 a les 19h entama la programación en Porrúa con un homenaxe a informantes de la zona y un conciertu del tríu femenín de percusión 6 Riales. Llueu va haber escenariu abiertu pa rematar la nueche siguiendo col baille tradicional. El día gordu va ser el sábadu 8. A les 11.30h na villa de Llanes con un taller d’iniciación al baille gallegu impartíu por Miguel Sotelo. De tarde, dende les 16.30h, en La Portiella de Llanes van actuar Pandereteros d’Anguaño y les agrupaciones folclóriques l’Andecha Folclor d’Uviéu, Asociación Cultural O Fiadeiro de Vigo y Grupu Etnográficu L’Oriente de Llanes. La xornada continúa colo que la organización presenta como «baille con artistas coñocíos del panorama musical del folk asturianu» y remata colos conciertos de Draque, el dúu cántabru Casapalma y Omiri de Portugal, apostando asina por formaciones foriates qu’entemecen tradición y electrónica.
«La Xira ñaz col enfotu del G.E.L’Oriente de poner en valor la tradición oral, interpretándola como un hechu cultural vivu susceptible d’usase de manera creativa amás de tener que cuidase pa la so conservación. Tamién tien l’oxetivu de dinamizar la música y el baille tradicional asturianu, creando espacios pa la participación de las xeneraciones xóvenes n’actividades rellacionadas col patrimoniu cultural», despliquen dende la organización del eventu.
Perspectiva de xéneru y más valores
La X.O.T.A. destaca tamién pola so defensa del feminismu. D’esta manera, reconocen a «la muyer como elementu fundamental ena tresmisión de la cultura tradicional» y l’alcuentru va incorporar un puntu violeta na folixa. Amás d’esto, puxen por otros valores como «los argumentos ecolóxicos pa la conservación del mediu, el respetu a la diversidá, la normalización del usu de la llingua asturiana y la promoción de recursos pal desarrollu del mediu rural». Toles actividaes son de baldre y na carpa’l festival va haber puestos con gastronomía de la zona y opciones veganes.
Suscríbite a les nuestres novedaes
