La #RomeríaEnLABoral inaugura la esposición dedicada a Rodrigo Cuevas esti vienres 17

Esti vienres 17 de mayu inaugúrase en LABoral Centru d’Arte y Creación Industrial la esposición protagonizada pol universu del axitador folclóricu Rodrigo Cuevas que va poder vese nesti espaciu xixonés hasta’l 8 de mazu de 2025. Pa festexar el so arranque, va celebrase la #RomeríaEnLABoral con una programación na que, dende les siete la tarde, van participar Les Pites, DJ Fañagüeta, DJ La Güeriata, DJ La Viuda de Angelín, el propiu Cuevas y los comisarios de la esposición, Ricardo Villoria y Llorián García.

«Esta esposición nun canoniza nin ensalza la figura de Cuevas; busca más bien xugar con ella, usala pa recomponer el nuestru propiu cuerpu: facer de la so sensibilidá un prisma, un mediu del que partir pa poner en marcha una investigación artística de calter participativu», despliquen dende LABoral sobre esta amuesa qu’afonda en «dalgunes de les sos práctiques, saberes informales que l’artista cultiva como parte del so llabor creativu, y que son tamién clave nes sos acciones de vitalismu vecinal». «Nesti procesu, centrámonos en so “gracia“, entendida como un poder popular alegre y contaxosu, capaz de descolonizar les tradiciones», añaden.

D’esta manera, la esposición comisariada pol artista multidisciplinar Ricardo Villoria y el musicólogu Llorián García y con diseñu gráficu de Sergio Llunik, recueye dellos elementos que conviden «a la diversión y al xuegu: cantares, dichos, histories contaes con gracia…». Un «esperimentu» con filosofía colectiva como lo ye tamién la #RomeríaEnLABoral d’esti vienres. Nella, amás de les presentaciones de Rodrigo Cuevas y de los comisarios, va haber a les 20h un taller de baille «tradicuir asturianu y fantasía» impartíu por Les Pites y les sesiones de tres DJs qu’amesten sones de raigañu d’Asturies y otres partes del mundu con soníos contemporáneos: Fañagüeta (21h), La Güeriata (22h) y La Viuda de Angelín (23h). Tamién va haber hasta la una la madrugada una barra con bebida y aperitivos xestionada pola llibrería-café Toma3 y La Perdiz Roja.

Entraes agotaes pal Campoamor

L’entamu de la esposición pon el ramu a una selmana na que Rodrigo Cuevas volvió a amosar el so indiscutible éxitu n’Asturies. El llunes punxo a la venta les entraes pa un conciertu el 27 d’avientu nel Teatru Campoamor d’Uviéu, qu’en poco tiempu s’escosaron; lo mesmo que pasó ayeri tres d’anunciar una fecha nueva pal 28 d’avientu. D’esta manera Cuevas repite rápidos sold outs como los que yá fizo nel Teatru La Llaboral de Xixón, nel Centru Niemeyer d’Avilés y como los que ta algamando en munchos de los sos conciertos per fuera’l país.

Comprar discos de Rodrigo Cuevas

Dexa un comentariu

X