Tres d’anunciar la fecha va unes selmanes, yá se conoz tola programación del Mercáu Tradicional La Flor de L.lena, una de les cites cola música asturiana más sonadía de la primavera. Del vienres 25 al domingu 27 d’abril el barriu La Caleya de La Pola va acoyer conciertos folk y rock, pasucáis, tarde en danza, alcuentros, canción asturiana y actuaciones d’agrupaciones tradicionales, amás d’otres actividaes culturales: cuentacuentos, circu, gastronomía, títeres, talleres, rutes, esposiciones y artesanía.
La música va entamar a sonar el vienres 25 a les 18h con un pasucáis de pareyes de gaita y tambor per La Pola. A les 20h hai un taller de baille tradicional impartíu por Ángeles Nespral y Tania García y a esa mesma hora la formación 9 a las 9 va facer cantares de chigre per dellos llocales de la capital l.leniza. A les 21h remata la xornada con una Xuntanza Astur-Gallega.
El sábadu 26 la programación entama a les 10.30h coles alboraes de pareyes de gaita y tambor y un pasucáis y actuación de la Banda Gaites Güestia -organizadora del eventu-. Tres de los actos institucionales y el pregón, les pandereteres de Xanzaina van actuar a les 13h onde l’horru d’esti mercáu. Pa les 17.30h entama l’Alcuentru Folclóricu La Flor de L.lena nel qu’hasta les 20h van actuar les agrupaciones Banda Gaites Güestia, Los Zamarrones, Do Lado do Sol (Galicia), Flor de Xanzaina, AG Virgen del Camino, Banda Gaites Esbardu y Eliseo Quiñones (Gaiteru Mayor del Conceyu L.lena). N’acabando va haber canción asturiana con Alicia Villanueva y Carlos Velasco y a les 23h conciertos col folk de Picarós y el punk-ska de Skama la Rede.
El domingu 27 la venti edición del mercáu zárrase con una programación tamién mui bayurosa en cuantes a la música: a les 11h pasucáis cola Bandina’l Peregrín; a les 13.30h conciertu na Yurta con Alba y María (dedicáu a les resistencies y resiliencies nes voces de les muyeres) y pa rematar una tarde en danza a les 18.30h cola Banda Gaites Güestia & Collacios, Pandereteres l’Artusu, Bandina’l Busgosu y Do Lado do Sol. Tamién actúa’l grupu llocal The Mokomitas a les 23h pa zarrar esti XX Mercáu Tradicional La Flor de L.lena.
Suscríbite a les nuestres novedaes
