Esti fin de selmana torna una de les cites imprescindibles cola música y la cultura’l país, el Mercáu Tradicional La Flor de L.lena. Del vienres 10 al domingu 12 d’abril el barriu La Caleya de La Pola va acoyer conciertos folk y rock, pasucáis, tarde en danza, alcuentros, canción asturiana y actuaciones d’agrupaciones tradicionales, amás d’otres actividaes culturales: cuentacuentos, circu, gastronomía, títeres, talleres, rutes, esposiciones y artesanía. Dientro la programación destaca tamién l’espectáculu del XXXV Aniversariu de la Banda Gaites Güestia.
La música va entamar a sonar el vienres 10 a les 20.30h con un taller de baille tradicional impartíu por Ángeles Nespral y Tania García que va calecer l’ambiente pa la Nueche en Danza. Dende les 23h Ramsés y Ambás y la bandina L’Andecha Turcipié van poner son a esta xuntanza pa baillar y cantar na que tamién hai micru llibre pa quien quiera participar.
El sábadu 11 la música entama dende bien ceo. A les 11.30h la Banda Gaites Güestia va dar una actuación; a les 13h toquen Pandereteres nel Horru y, yá pela tarde, a les 17h Güestia faen un pasacáis. Los conciertos de la nueche van ponelos el cuartetu de música tradicional Abéu y la mítica banda de rock astur Dixebra.
Pal domingu 12 los sones tradicionales enllenen el barriu La Caleya. A les 11.30h actúa’l dúu Cacía, a les 12.30h l’agrupación tradicional Flor de Xanzaina y a les 14h hai Vermú en Danza con María Trubia y Pau Santirso. Pela tarde L’Artusu de Figaredo faen un pasacáis y una actuación que van preceder a ún de los momentos más especiales de la programación, el Conciertu XXXV Aniversariu Güestia & Collacios.
«El domingu vamos tocar acompañaos d’una banda de músicos: batería, baxu, guitarra acústica, bouzuki, guitarra eléctrica, teclaos, baxu, violín, acordión, clarinetes, xiblates… y llueu yá la formación de la banda, coles gaites y Do, les caxes, bombo y timbales», avanza Saúl Quiñones, director de la Banda Gaites Güestia del espectáculu que van dar pa festexar los sos 35 años.
Dientro’l repertoriu van tocar «dalguna cosina tradicional», pero la so intención ye «da-y una vuelta a lo habitual» que suelen facer. D’esta manera ye como van facer un tributu «a grandes bandes rock de la historia«, interpretando temes de Queen, Dropkick Murphys, Elvis o Europe. Nesti homenaxe tampoco falta la música asturiana, y por ello van tocar tamién «una de Los Berrones, un set n’alcordanza de La Col.lá Propinde y unes canciones de Spanta la Xente«, añade Quiñones.
«Spanta la Xente van tar como collaboradores, vamos tocar cinco o seis cantares cola banda gaites, pero nun ye un conciertu de Spanta, son unos temes tocaos xunto a la banda y el protagonismu ye de Güestia«, sorraya Saúl Quiñones sobre la participación dientro d’esti espectáculu d’esti grupu folk-rock que lleva seis años ensin subir a los escenarios y del que tamién ye gaiteru. Tamién van andechar con Güestia otros «collacios» como «Imanol Núñez, Ángeles Nespral, el grupu de baille de L’Artusu, Pablo de Llariegu«. D’esta manera la veterana banda va celebrar 35 años puxando pola música de raigañu dende’l conceyu L.lena: «faciendo dalgo que se sal un poco de lo común, disfrutando y ensin más pretensión que pasalo bien«.
Suscríbite a les nuestres novedaes
