Eladio Díaz «FE»: L’alcuentru del jazz, el folk y la música clásica

Los mundos del folk, jazz y la música clásica converxen n’ún del puñu y lletra d’Eladio Diaz. El saxofonista y compositor avilesín presenta, xunto al so Folk Ensemble, “Fe”. Arreglos y solos escepcionales entemecíos con testos d’escritores asturianos guíanos per esti viaxe interplanetariu nun trabayu que sirve de gritu al hedonismu y a la independencia creativa.

Los once temes d’esti discu divídense en nueve movimientos y dos interludios, como si fora una suite clásica. Tá grabáu por doce músicos; destaquen del llau folk Rubén Bada y Pepín de Muñalén; del jazz  Horacio García, Fernando Arias y Jacobo de Miguel. Tamién tenemos el casu de Mapi Quintana, que sobresal nos dos mundos y la so voz, que viaxa d’ún a otru con una sensibilidá maraviyosa, pon la guinda a un pastel d’una hora y cuartu, grabáu nel Teatru Palacio Valdés d’Avilés.

Fe” lleva dientru la suite nomada “Obsolescencia Programada“. La idea que tresmite esta obra ye engarrase col conceptu del rendimientu instantáneu, resultadista, que por desgracia tamién esiste na música. Busca una llibertá creativa despegando dende la música asturiana. La Tonada, el Son d’arriba o la Habanera pueden facer que “Fe” seya’l discu de cabecera p’amantes del jazz, el folk o la música clásica. Tamién pue ser esa ponte que nos dexe romper les barreres impuestes por nós mesmos y sentir una música que nos desafíe. La suite “Obsolescencia Programada” nun tien pinta de quedar obsoleta pronto. Y si lo fai, que seya depués de que munchos la esfrutemos en directo.

CARLOS CASADO, responsable del proyectu Jazz del Llar

Comprar discos de jazz asturianu na tienda online


Dexa un comentariu

X