Esti 31 de mayu a les 20 hores, l’Auditoriu Príncipe Felipe d’Uviéu va vibrar colos ecos d’un pasáu convertíos en música. Más de 70 músicos van xubir al escenariu pa dar vida a 13 Reyes – Episodiu I, un poema sinfónicu que nun cunta namás la historia d’Asturies, sinón que la siente en cada acorde. Dende’l so estrenu en Mieres hasta’l so pasu per Lorient, la obra cautivó a quien la sintió. Agora, na so primer interpretación nuna sala conciertos, los verdaderos protagonistes -los sos músicos- comparten qué significa pa ellos esta obra que ye tanto música como identidá.
13 Reyes ye’l resultáu de la unión de la Banda de Gaites La Laguna del Torollu (San Cloyo) y la Banda Sinfónica Ateneo Musical de Mieres, cola batuta d’Iñaki Sánchez Santianes. La música, compuesta por Yónatan Sánchez Santianes, entemez melodíes de raigañu asturianu con pasaxes orixinales qu’evoquen escenes de los monarques del Reinu d’Asturies. Los músicos descríbenla como «monumental», «única», «impresionante» y «que nun se pue escaecer».
«13 Reyes ye’l resultáu de la unión de la Banda de Gaites La Laguna del Torollu (San Cloyo) y la Banda Sinfónica Ateneo Musical de Mieres, colabatuta d’Iñaki Sánchez Santianes y la música compuesta por Yónatan Sánchez Santianes»
Al entrugar a los músicos pol so momentu preferíu de la obra, les respuestes dibuxen un mosaicu de sensaciones. Pa Iñaki Sánchez, ye’l primer acorde de ‘Pelayo’, una obra na que s’empleguen sonoridaes contrastantes pa identificar al exércitu astur y al musulmán. Miriam Casanova destaca la percusión inicial de ‘Turman’. Otros músicos –como Adrián Sierra, Marcelino Fernández, Marco Pérez, Nacho Fernández o Rafael Hermida– alcuentren emocionantes movimientos como ‘Mauregato’. ‘Ordoño I’, ‘Aurelio’, ‘Ramiro I’ o ‘Mencía’, esti últimu un homenaxe a toles muyeres que foron silenciaes pola historia. Caúna d’estes obres tienen testures sonores estremaes: pasaxes de gaita solista, contrastes dinámicos y tímbricos que dan mayor dramatismu a la obra.
Tres la cancelación del conciertu previstu n’ochobre por mor de la DANA, esti eventu tien un significáu tovía más especial. Los músicos de la banda gaites conocieron la noticia segundos enantes d’entrar en directo en Conexión Asturias, onde anunciaron la cancelación del conciertu y interpretaron l’himnu d’Asturies n’homenaxe a les víctimes. Por ello, músicos como José Luis García anticipen “un conciertu mui emocionante tres d’esta cancelación”.
«Músicos como José Luis García anticipen un conciertu mui emocionante tres de la cancelación del pasáu ochobre por mor de la DANA»
Les espectatives pal conciertu d’esti sábadu son altes: “Va ser una fecha inolvidable que nun va dexar indiferente al públicu”, diz Miriam Casanova. Una integante de la sección de vientu maera nagua poder tresmitir al públicu “la emoción y ilusión cola que tocamos” y que “sienta lo que sentimos nós dende dientro”, añade Adrián Sierra. Por último, Nacho Fernández y Iñaki Sánchez, lo mesmo que los demás músicos, tienen ganes de ver enllenu l’Auditoriu y que’l conciertu seya un gran éxitu.
Pa quien tovía dulda si dir o non al conciertu, los propios músicos ufren les sos razones p’asistir: “Cenciellamente propóngo-yos un plan perfectu. Aprovechar pa ver la Feria de L’Ascensión tol sábadu, sentir 13 Reyes a última hora de la tarde y cenar per Uviéu cuando termine’l conciertu. Nun s’arrepentirán”; “¡Ven! Esti conciertu nun vas senti-ylo a naide y ye una esperiencia que nun se pue escaecer”; “Sentir esti poema sinfónicu con esta calidá tanto musical como humana ye una oportunidá que nun se pue dexar escapar”.
«Dambes formaciones treslladaron el proyectu tamién a les artes plástiques y nel Espaciu Cultural 1910 de Mieres pue vese la interpretación pictórica de dellos artistes»
Amás, dambes formaciones quixeron llevar el proyectu acuyá de la música, treslladándolu tamién a les artes plástiques. Por ello, dende’l llunes 26 de mayu pue vese nel Espaciu Cultural 1910 (Mieres) la interpretación pictórica de dellos artistes de dalgunos de los monarcas musicalizaos. Asina, Silvia Alonso Díaz foi la encargada de plasmar la Batalla de Cuadonga nun cuadru, mientres que Mayte Fernández Encinar y Ilustraciones Amaro foron les encargaes de reflexar los ambientes festivos de ‘Aurelio’ y ‘Ramiro I’, respectivamente.
Si dempués de lleelo entráronte ganes de ver el conciertu, La Laguna del Torollu y l’Ateneo Musical de Mieres espérente nel Auditoriu Príncipe Felipe (Uviéu) el 31 de mayu a les 20h. Y, nun dexes pasar la oportunidá d’averate a Mieres pa ver les pintures asociaes a eses melodíes.
Suscríbite a les nuestres novedaes
