Andrea Joglar: «Pedagoxía y colectividá»
Alcontrámonos nun momentu de necesaria reflexón y replantegamientu estratéxicu no que cinca la música venceyada colo popular y tradicional. Aveza dicise que venimos d’una etapa que podríemos denomar como d’escesiva dependencia de les ayudes económiques públiques y del sofitu institucional. Esta afirmación mana del contestu social del cambéu de mileniu: nos años 90 y entamos de la década del 2000, paecía esistir un ciertu interés nes corporaciones gubernamentales asturianes por caltener y promocionar les señes culturales y musicales propies. Recoyíase asina’l frutu semáu nes décades anteriores polos distintos movimientos de recuperación llingüística y etnográfica, y por coleutivos que defendíen les tesis celtistes como un preséu solidariu pa los pueblos que, como l’asturianu, taben somorguiaos nes agües turbies y uniformadores del centralismu estatal. Esi interceltismu afitóse como una etiqueta cultural, identitaria, simbólica, política y comercial que sirvió pa texer redes rellacionales ente dellos territorios asitiaos nel Arcu atlánticu —les denomaes naciones celtes—, que presentaben carauterístiques y problemátiques comunes. En resultes d’esta especie de Revolución de los Trisqueles, víemos cómo se consolidaba la presencia d’Asturies nos principales festivales intercélticos d’Europa; cómo surdíen mercaos artesanales y chigres comprometíos cola difusión d’esti fervor cultural; cómo remanecíen agrupaciones variaes que xiraben alredor del mundu, como grupos de folk o bandes de gaites; y cómo medraben dientro de les escueles municipales de música les enseñances d’instrumentos de la tradición, especialmente, les de gaita.
«L’interceltismu afitóse como una etiqueta cultural, identitaria, simbólica, política y comercial que sirvió pa texer redes rellacionales ente dellos territorios asitiaos nel Arcu atlánticu»
Sicasí, l’españíu de socesives crisis económiques y sociales asoleyó una cara bien distinta de ciertos seutores políticos d’Asturies. L’autoodiu y los complexos d’inferioridá carauterísticos del país diseñaron un calendariu de prioridaes nel que los primeros recortes diben afeutar al ámbitu cultural y, n’especial, al de la música de raigañu popular, vista como una caxigalina, un daqué menor qu’avezaba folclorizase pa fines institucionales concretos.Esti amenorgamientu de les ayudes públiques xeneró un efeutu dominó: decai la rede de circuitos y escenarios musicales; poro, les agrupaciones tienen menos espacios nos qu’espresase. Esti fechu produz un paralís nes actividaes que se desendolcaben hasta entós, sobre too en rellación col ánimu de los distintos grupos musicales p’afrontar nuevos proyeutos o grabar trabayos discográficos. En resultes d’ello, los felices años 2000 dieron pasu a un ermu musical, onde cada vegada yera más abegosu atopar referentes y espacios de xuntanza afayadizos.
«L’autoodiu y los complexos d’inferioridá carauterísticos del país diseñaron un calendariu de prioridaes nel que los primeros recortes diben afeutar al ámbitu cultural»
Llegamos asina al contestu actual, nel que tenemos de buscar les estratexes precises que mos permitan combatir esi inmovilismu y refalfiu derivaos de l’aparente falta de perspeutives de futuru. En rellación cola gaita, considero que’l llabor pedagóxicu ha xugar un papel fundamental. Alcontrámonos nun momentu d’espoxigue d’alumnáu, especialmente, nos contestos urbanos; por embargu, esti crecimientu cuantitativu nun se traduz necesariamente nuna mayor toma de conciencia del valir que tienen les músiques tradicionales pa la identidá de los pueblos. Nesti sen, cuido que la perda d’esta conciencia tien muncho que ver col denomáu «movimientu de dignificación de la gaita». Nun duldo qu’esti afán dignificador surdiera cola meyor de les intenciones, pero paez que colos años foi tresformándose nun arma de doble filu. Pel llau positivu, l’afondamientu na investigación y meyora de dellos de los sos aspeutos constructivos y téunicos facilitó la entrada de la gaita en nuevos xéneros musicales, repertorios y espacios educativos hasta va poco impensables, y vistióla d’un ciertu cosmopolitismu enforma atractivu pal nuevu alumnáu urbanu. Pero, d’otra parte, el propiu conceutu de «dignificación» surde d’un complexu d’inferioridá consciente o inconsciente; d’una perceición elitista de la música qu’asitia los instrumentos tradicionales y populares nos márxenes y alienda’l desaniciu de delles de les sos particularidaes pa que puedan comer na mesa d’otros instrumentos de mayor prestixu social. Creo que, nesti procesu de necesaria esploración de les posibilidaes musicales de la gaita, hai de decatase de que ye un símbolu de gran poder identitariu y que pertenez al bayurosu ecosistema de les músiques de raigañu. Poro, dende un planu pedagóxicu, nun hemos cayer na so individualización y aisllamientu en rellación con otres manifestaciones artístiques de la tradición; asina como tampoco tenemos de dexar de llau la tresmisión de la importancia ritual y social que tien esti instrumentu n’Asturies. D’acordies con ello, podría ser un bon momentu p’algamar un compromisu docente que puxe por una implicación emocional más fonda na xente que s’avere per primer vez al mundu de la música tradicional; que xenere una sensación compartida de comuña; y que contribuya non solo a conocer y recrear les manifestaciones tradicionales del pasáu, sinón que tamién permita atopar espacios afayadizos pal desendolcu y adautación d’estes músiques nel presente.
«Ye’l momentu p’algamar un compromisu docente que puxe por una implicación emocional más fonda na xente que s’avere per primer vez al mundu de la música tradicional»
Seique seya’l tiempu d’apostar pola capacidá d’autoxestión, pol puxu y sofitu d’iniciatives particulares pente medies del texíu y afitamientu de redes collaboratives ente los diferentes axentes implicaos nel deprendimientu, difusión, promoción y receición de la música tradicional: docentes, alumnáu, intérpretes, bailladores, iniciatives etnográfiques, asociaciones y coleutivos diversos, sales y espacios pa conciertos, públicu, etc. A la fin, ye facer pueblu; xenerar un entramáu comunal, de diálogu, de consciencia y conciencia de grupu; recuperar l’interés de la xente polo fecho nel país; y, a lo cabero, sumar a les instituciones a esti procesu de promoción d’una «Marca Asturies» atrautiva y comprometida cola so bayura cultural ya identitaria.
