«Un reconocimientu a la xente que compartíu’l sou sabere». Esi ye l’oxetivu col que l’asociación Escontra’l Raigañu d’Avilés entama pa esti sábadu 31 dende les 19.30h una xornada na Casa’l Pueblu d’El Val.le (Somiedu) na que va haber proyecciones de testimonios audiovisuales, baille y un homenaxe a les persones que caltuvieron el patrimoniu cultural nesti territoriu. Too ello cola participación de Xosé Ambás y Ramsés Ilesies del ATOAM.
«Al traviés de les informantes qu’inda viven como Piru, Pili, Adolfina y Maruja, queremos dar les gracies a toles persones que nel so día nos abrieron les sos puertes y cantaron, cuntaron, baillaron y tocaron la pandereta. Gracies a elles y a otres muyeres y homes que yá nun viven, güei podemos siguir tresmitiendo tou esi patrimoniu, fiel testigu de la riqueza cultural d’esti territoriu y la so xente», anunció Escontra’l Raigañu a traviés de les sos redes sociales.
D’esta manera, na xornada del sábadu va haber una proyección d’audiovisuales de los testimonios recoyíos nos pueblos d’El Val.le, Urria y La Pola per parte d’Escontra’l Raigañu nos años 80 y del Archivu de la Tradición Oral d’Ambás (ATOAM) nos años 2000. Xosé Ambás va ser el presentador de la cita na que tamién va haber daqué pa «facer boca» y va echase un baille.
Suscríbite a les nuestres novedaes
