Del 19 al 25 de xunu Llaranes va acoyer una edición nueva del Ciclu Festivu del Branu, xornaes qu’entama l’asociación Escontra’l Raigañu y nes qu’hai tarde en danza, alcuentru d’escueles de pandereta, enrame de la fonte y una charra. El baille tradicional, los ritos del agua y la danza protagonicen los conteníos d’estes actividaes gratuites enmarcaes dientro del Aula Didáctica de Cultura Popular Asturiana.
La programación va entamar el vienres 19 de xunu cola Tarde en Danza. A les 19.30 hores va haber una actuación al cargu de la Bandina d’Avilés Urriellu, mentes que a les 20.00 hores va celebrase’l V Alcuentru d’Escueles de Pandereta, nel que participen Escontra’l Raigañu (Avilés), Muyeres por Grau (Grau) y Ximielga la Saya (Avilés).
El martes 23 de xunu, coincidiendo cola nueche de San Xuan, los Ritos de l’Agua protagonicen la xornada. Pela mañana, dende les 11.00 hores, va facese l’enrame de la fonte de la Plaza Mayor, una de les tradiciones más característiques del solsticiu de branu.
La programación va concluyir el xueves 25 de xunu cola xornada Sones y Danza. A les 19.00 hores, nel Centru Sociocultural de Llaranes, va tener llugar la charra La danza tradicional asturiana como Bien d’Interés Cultural (BIC), impartida por Ramsés Ilesies y Xosé Antón «Ambás». Más tarde, a les 20.30 hores, la Plaza Mayor d’esti barriu avilesín acueye los sones pal enrame y una danza alredor de la fonte al cargu de la escuela de pandereta Escontra’l Raigañu. Con esta actividá, la veterana agrupación avilesina sigue creando comunidá al rodiu la cultura y la tradición asturiana.
Suscríbite a les nuestres novedaes
