Nacho Fonseca ye una de les persones claves del movimientu modernu de recuperación llingüística. Foi de los primeros mayestros qu’hubo d’asturianu, ye Académicu Correspondiente de l’Academia de la Llingua Asturiana y, sobre manera, ye perconocíu por ser el fundador y responsable de los grupos infantiles Seliquín y Xentiquina. Esti llabor en defensa y difusión del idioma y la cultura llevó a que l’asociación El Llavaderu -col sofitu d’otros colectivos- llevara en 2020 la propuesta al Ayuntamientu de Siero de que nomaran a Fonseca Fíu Predilectu del conceyu. La propuesta aprobóse por unanimidá, ratificóse en 2021 y esti vienres 10 va ser l’actu institucional del nomamientu a les 20 hores nel Auditoriu de La Pola Siero.
Nacho Fonseca, amás de músicu, compositor y mayestru destaca por ser el «padre» de Xentiquina, una de les formaciones musicales más importantes pa la llingua asturiana, yá que foi l’únicu grupu formáu esclusivamente por neños y neñes y, per 25 años, foi la única formación que facía cantares n’asturianu pa la reciella. La so historia ye inseparable de la del mayestru Nacho Fonseca, que nel cursu 1986-1987 cuando daba clases en Porrúa, decidió facer un grupu musical con dellos de los sos escolinos. Llamáronse Seliquín y llegaron a grabar un discu.
Col treslláu de Fonseca a dar clases a Lieres, ésti reconvirtió’l proyectu en Xentiquina. Foi una revolución pa la música n’asturianu, una ferramienta imprescindible pal enseñu de la nuestra llingua y tou un éxitu; asoleyaron dellos discos, dieron un centenar de conciertos per escueles y escenarios del país y involucraron a cientos de neños y neñes na xera de cantar n’asturianu.
Suscríbite a les nuestres novedaes
