El vienres 31 d’ochobre presentóse la edición nueva del Ciclu de Folk de Cámara Ígor Medio, cita fundamental cola música tradicional que dende 1999 vien celebrándose cada dos años en Xixón y que dende hai unos años lleva’l nome del so creador, el músicu y dibuxante fináu en 2006. Anguaño va haber trés conciertos los vienres 7, 14 y 21 de payares, a les 19.30h, nel Muséu Casa Natal de Xovellanos. Gracies al realizador audiovisual Javi Lueje y a la xenerosidá de Sonia Tuya -madre d’Ígor Medio- MUSICASTURIANA.COM ufre un videu cola rueda prensa na que se presentó esti ciclu.
L’actu tuvo enllenu d’emotividá, de compromisu cola identidá d’esti país, d’alcordanza y, tamién, de futuru. Nuna sala enllena intervinieron los músicos Alberto Ablanedo, Pepín de Muñalén y Rubén Bada (tocando pieces compuestes por Ígor); la conceyala de Cultura de Xixón, Montserrat López Moro; la conseyera de Cultura, Política Llingüística y Deporte, Vanessa Gutiérrez; el músicu y programador del ciclu, Xel Pereda; y la cantante y panderetera Leticia Baselgas. La meyor forma de reflexar la guapura de les sos pallabres y de les melodíes interpretaes ye tresmitilo tal y como foi, al traviés del videu con toles intervenciones.
Mañana vienres 7 de payares a les 19.30h nel Muséu Casa Natal de Xovellanos entama esti ciclu organizáu pola Fundación de Cultura, Educación y Universidá Popular de Xixón coles actuaciones de trés músicos mozos: Julio Rodríguez (bouzuki), Irene Vioque (vigulín) y Guillermo Zumajo (flauta), que van ufrir un conciertu de música folk con un repertoriu centráu na tradición asturiana, que s’amplía con temes d’otros territorios como Irlanda, Escocia o Madrid, d’onde vienen d’Irene y Guillermo.
Pal vienres 14 de payares axúntense Xosé Ambás, Pepín de Muñalén y Vero Rubio pa recuperar la filosofía del grupu Tuenda, nel que l’ATOAM apurre los materiales que, en munchos casos inéditos, son frutu del so valiosu trabayu de campu. Un repertoriu variáu llingüística, xeográfica y temáticamente que fai una apueste novedosa na qu’Ambás y Pepín, vieyos compañeros de Tuenda, s’arimen al brillante trabayu de Vero al pianu.
El ciclu remata’l 21 de payares con otru conciertu bien especial, el del Cuarteto Tor, formación gallega que tienen anguaño los ex fundadores de Felpeyu -xunto con Ígor Medio y Ruma Barbero- Cástor Castro (flautas de madera, duduk, flauta de buitre) y Félix Castro (anglo concertina, acordeón diatónico, gaita), acomapñaos d’Álvaro Iglesias (contrabajo) y Xosé Liz (bouzouqui).
Suscríbite a les nuestres novedaes
