Xixón va sumase esti 21 de xunu a la celebración de la Fiesta de la Música, una cita internacional que se conmemora en más de 120 países y que busca sacar la música a les cais, places y espacios públicos. Dientro de la programación diseñada pola Fundación Municipal de Cultura, Educación y Universidá Popular (FMCEyUP), la música tradicional asturiana va tener un protagonismu especial coles actuaciones de bandes de gaites y grupos de baille repartíos per distintos sitios de la ciudá en dos bloques horarios: a les 12.30h y 20h.
Pela mañana actúa’l el Grupu Folklóricu Marabayu na Plaza d’Italia, el Grupu Folklóricu Na Señardá na Plaza de la Guía; la Banda de Gaites Conceyu de Xixón nel Parque de Contrueces (Les Palmeres); el Grupu El Turruxón na Plaza del Doctor Eguiburu; el Grupu Folklóricu Flor de Xaranzaína na Plaza del 3 d’Abril, xunto a les Piscines d’El Llano; el Grupu Folklóricu Covadonga nos Xardinos del Náuticu; y la Banda de Gaites Magüeta nel Parque de la Urgisa, en Pumarín.
La celebración va continuar pela tarde, dende les 20h hores, con actuaciones del Grupu Folklóricu Excelsior na Plaza del Doctor Eguiburu; el Grupu Folklóricu Los Xustos na Plaza del Marqués; la Banda de Gaites Villa de Xixón nel Parque Madres de la Plaza de Mayo; el Grupu Folklóricu El Xolgoriu nel Campu Valdés; la Banda de Gaites Saxum na Plazuela de San Miguel; la Banda de Gaites Noega xunto a la escultura Homenaxe a los Neños de la Guerra, na Playa de l’Arbeyal; y la Banda de Gaites Villa de Jovellanos nel Parque de la Fábrica del Gas.
Amás d’estes actuaciones de música de raigañu, tamién va desfilar la New Orleans Presence Brass Band; actúa la Orquesta de flautes del Conservatoriu Profesional de Música y Danza de Xixón; y ye’l conciertu de pieslle de la segunda edición del semilleru de bandes Xixón Fem Music.
La Fiesta de la Música nació a partir d’una idea impulsada en Francia pol músicu norteamericanu Joel Cohen en 1976, quien promovió la celebración de conciertos coincidiendo colos solsticios. Dende 1982, la iniciativa convirtióse nun eventu internacional que reivindica la música como ferramienta de convivencia, participación cultural y disfrute colectivu. La FMCEyUP propón pa celebralo esta «amuesa de diferentes estilos que pon de manifiestu la creatividá de los artistes llocales».
Suscríbite a les nuestres novedaes
