El pasáu mes de xunu cumpliéronse 20 años dende que la música asturiana perdió a dos de les sos figures más destacaes: Ígor Medio y Carlos Redondo. Cola so perda surdió la iniciativa N’Alcordanza, festival que celebró delles ediciones pa homenaxear a estos dos artistes, amás de reivindicar la música en vivo y les condiciones llaborales del sector. Esti sábadu 25 de xunetu vuelve esti conciertu con seis grupos y más de seis hores de música pa facer la previa Arcu Atlánticu de Xixón.
Esti conciertu especial axunta folk y rock alternativu, acordies a los estilos nos que desenvolvieron el so llabor Medio y Redondo. Pela parte tradicional van tocar van tocar les mítiques formaciones de folk asturianu Felpeyu y Llan de Cubel y los gallegos Hermanos Castro, fundadores de Felpeyu xunto a Ígor Medio y Ruma Barbero. A la estaya de rock independiente represéntenla Radio Fox -grupu tributu a Los Locos, nel que tocó Carlos Redondo-; Kactus Jack -banda enmarcada dientro del Xixón Sound-; y los gaditanos Jaguares de la Bahía, formación na que milita Paco Loco, destacáu productor y ex compañeru de Redondo en Los Locos.
La serie de conciertos va abrila Llan de Cubel, que van ser los encargaos de tocar de 16:00 a 16:50. Tres ellos, los gallegos Hermanos Castro van facer lo propio entre les 17:10 y les 17:30, mientres que Felpeyu van zarrar esta primer parte del conciertu homenaxe, tocando ente les 17:50 y les 18:40 hores.
Yá na segunda parte del homenaxe, Radio Fox va tocar dende les 19:30 hores, mientres que’l turnu de Jaguares de la Bahía va llegar a les 20:45 hores. A lo último, Kactus Jack van poner el ramu a esta xornada emotiva a partir de les 21:45 hores.
Esti conciertu N’alcordanza va calecer l’ambiente pal Arcu Atlánticu, festival que celebra la so XI edición dende’l llunes 27 de xunetu al domingu 2 d’agostu. Música, teatru, danza, artes plástiques y audiovisuales, gastronomía y cine rellacionao coles identidaes culturales de los pueblos integraos nesti territoriu van dar forma a la programación diseñada pola Fundación Municipal de Cultura, Educación y Universidá Popular de Xixón.
Suscríbite a les nuestres novedaes
