Felpeyu y L-R actúen nel actu homenaxe a Yolanda Huergo

El 6 d’agostu de 2020 finaba Yolanda Huergo, histórica militante de la Xunta Pola Defensa de la Llingua Asturiana, d’Amnistía Internacional, del asturianismu políticu y, dende mayu de 2019, conceyala de Podemos Asturies nel Ayuntamientu de Xixón, conceyu nel que nació y vivía. Yolanda foi una persona mui querida y respetada dende dellos ámbitos, tamién dende’l mundu de la cultura y la música asturiana. Por eso, el domingu 26 de setiembre la música del país va tener un papel protagonista nel actu d’alcordanza qu’entama la Xunta Pola Defensa de la Llingua Asturiana nel Muséu del Pueblu d’Asturies. A partir de les 12:30h va haber intervenciones de «persones que conocieron a Yolanda y el so compromisu social y políticu» -como desplica nun comunicáu la organización en defensa del asturianu-, y música en directo coles actuaciones de Felpeyu y L-R, «dos de los grupos de los que Yolanda disfrutó munches vegaes».

«La música d’esti país nun podía faltar nun homenaxe a una persona que la vivió de manera intensa», sorrayen dende la Xunta Pola Defensa de la Llingua Asturiana, a la par que llamen a participar nesti día «n’alcordanza d’esta persona y de tolo que significó y va significar». La xornada tien entrada llibre y va ser va ser una «una mirada señaldosa a lo qu’ella foi, pero tamién una mirada al futuru enllena de tol compromisu qu’amosó Yolanda na so vida».

Dexa un comentariu

X