La OSPA interpreta ‘La Noche Celta’ de Ramón Prada en Cangues d’Onís

El xueves 23 d’esti mes de setiembre la Orquesta Sinfónica del Principáu d’Asturies va interpretar la obra La Noche Celta, del compositor Ramón Prada, frente a la Ponte de Cangues d’Onís, un escenariu inéditu que va realzar esta pieza de calter orquestal fecha pol músicu cangués. L’horariu previstu son les 20:00 hores y la entrada llibre, el conciertu va poder siguise dende les trescientes sielles que van asitiase nel llugar, amás de nes zones averaes, pero nesti casu de pies. L’accesu va abrise a les 19:00 hores y van cumplise toles midíes de seguranza y sanitaries.

Esta suite sinfónica creábala Ramón Prada nel añu 1992 inspirada na novela del escritor cuañés Juan Noriega del mesmu títulu, onde narra una historia que se desenvuelve nel castru d’esi conceyu. Tres años más tarde diba publicase la primer versión d’esta obra, que diba algamar el reconocimientu de la crítica y l’interés del públicu. Nel añu 1998 la OSPA estrenaba La Noche Celta nel Festival Intercélticu de Lorient/An Oriant, llogrando un éxitu pergrande; volviendo a rexistrase la suite pero yá na so versión definitiva.

Si la metereoloxía lo permite, el conciertu d’esti xueves va ser una oportunidá única de disfrutar d’esta obra, nun llugar afayadizu, na que la OSPA va tar acompañada pola Banda de Gaites Ciudá de Cangues d’Onís y el propiu Ramón Prada.

Comprar discos música clásica, coral y lírica na tienda online