“Pogu, Perréu y Pandereta” con Desaniciu, Ácida y L-R
La marca de ropa Puru Remangu ta acabantes d’asoleyar una camiseta y pegatines con un diseñu dedicáu a la música fechu pola artista porruana Nieves González y cola frase “Pogu, Perréu y Pandereta“. Esti llema púnxo-y nome a la playlist de Spotify qu’asoleyó esta marca’l pasáu mes de xineru -na que pue sentise una montonera bandes d’Asturies y na que MUSICASTURIANA.COM collaboramos cola escoyeta musical-, y agora garra formatu físicu gracies a la nueva camiseta y pegatines.
Amás, pa les semeyes promocionales d’esta camiseta participaron Vane del grupu punk-hardcore Desaniciu (escena pogu); la intérprete de rap, trap y reggaeton Ácida (escena perréu); y Leticia Baselgas de L-R (escena pandereta). Próximamente, la marca va dir llanzando nes sos redes sociales una serie d’entrevistes en videu nes qu’estes tres artistes falen de música, muyer, la so trayectoria y les sos escenes musicales, ente otres coses.
Asina presenta Puru Remangu esti nuevu diseñu:
Pogu, porque nos presta la cultura punk, defendemos la autoxestión y el “failo tu mesma/u”. Nada como un buen pogu pa baillar, brincar, y descargar bien les tensiones acumulaes! Eso sí, nel pogu como na vida misma, si una compañera cai al suelu, lo primero que se fai ye da-y la mano pa que se ponga de pie y poder siguir compartiendo bail.le y mugor.
Perréu, porque amosamos otres cultures, deprendemos d’otros ritmos y creyemos na llibertá de cada una pa movelo como y con quien más-y pete! Préstanos pela vida perrear y nun queremos que nos vengan a xulgar, asina que los que nun lo entiendan, que s’aparten y nos dexen bail.lar.
Pandereta, porque son los nuestros raigaños y tocando la pandereta munches muyeres tresmitieron gran parte de la nuestra cultura tradicional que ta presente güei na nuestra vida y que nun podemos escaecer. Con una pandereta y muncho remangu pue montase una bona folixa, y ehí ta la maxa de la vida, facer coses grandes dende lo simple, dende lo pequeño.
