Yá tenemos nomes de les persones ganadores de les entraes p’Amosando. El sorteú ficímoslu a traviés de la web socialgest y les persones que ganaron una entrada doble pal Amosando d’esti domingu 23 d’ochobre son les de la imaxen. Dende musicasturiana.com vamos contactar con elles a traviés del corréu electrónicu pa da-yos tolos detalles y confirmar asistencia.
La edición 2022 d’Amosando, el ciclu de presentaciones de discos de música asturiana, con conciertos en formatu íntimu grabaos y emitíos llueu per Internet, llega al so final. El domingu 23 d’ochobre a les 12h del mediudíua en Les Naves d’El Natahoyo va ser l’últimu conciertu/grabación coles actuaciones de Slum Suit y Mostru l’Horru, dos propuestes sonores orixinales dientro de la música asturiana. Les entraes pal eventu son namás pa la xente asociao a L’Ensame de musicasturiana.com que ganó esti sortéu.
Slum Suit ye un proyectu de jazz de raigañu que trabaya cola música popular asturiana amestándola a armoníes jazz. Nació en Nueva York en 2017 y en 2019 afincóse n’Asturies. ‘La Casa Vieya’ ye’l so tercer EP, nel qu’anoven el so soníu y incorporen al grupu a veteranos de la escena jazzística astur.
Mostru l’Horru ye un proyectu de hip hop n’asturianu fundáu en 2021 pol xixonés Fran Méndez y nel que participa’l productor llangreanu Zeros. ‘Señales de Fumu’ ye’l so primer trabayu, un discu rap d’ocho cantares nel que tamién suenen influyencies d’otros estilos como’l reggae o’l rock.
Tres años y 20 artistes
Amosando nació en marzu de 2019 a idea de la plataforma musicasturiana.com. Nesti tiempu tocaron 18 artistes pa presentar les sos novedaes discográfiques: L-R, Xaime Martínez, Ún de Grao, D’Urria, Anabel Santiago, Eva Tejedor & Les Pandereteres, Cerezal, Silvia Quesada, Felpeyu, Fruela 757, Bestiariu, Misiva, Carlos Rubiera, José Manuel Tejedor, Llevólu’l Sumiciu, Fernando Valle Roso y Silvia Moreno, Toli Morilla y Caldo y Os Rabizos, Baxel y Algaire. La suma de los videos de los conciertos algama más de 200.000 reproducciones en YouTube.
Estes actuaciones reflexen la calidá de la música fecha en llingua asturiana amás de la so diversidá, yá qu’estilos como’l pop, indie, electrónica, folk, tonada, canción d’autor y rock suenen nesta iniciativa realizada audiovisualmente por Javi Lueje y Rubén Álvarez y patrocinada nesta edición por Fundación Caja Rural de Asturias y col sofitu de la Fundación Municipal de Cultura y Educación de Gijón/Xixón.
Suscríbite a les nuestres novedaes
