Esti sábadu 22 d’ochobre’l Premiu Camaretá al Meyor Cantar aporta a la so décimocuarta edición. A les 22h Llaboral Ciudá de la Cultura va acoyer la gala final d’esti premiu que convoca la Conseyería de Cultura, Política Llingüística y Turismu y na que van actuar los trés grupos finalistes –Algaire, Mostru l’Horru y Dixebra-, escoyíos nuna primer fase pol xuráu especializáu ente toles composiciones musicales escrites n’asturianu o gallego-asturiano, espublizaes a lo llargo del añu 2021 y parte del 2022. TPA tamién va emitir l’eventu en directo.
El grupu Algaire, formáu por Iratxe Espina, Carla Miranda, Loreto Suárez y Juan Yagüe, preséntase a esta edición del Premiu «Camaretá» con Coral y maera, un cantar con lletra y música de Luis Ángel Fernández Santos. El dúu de rap Mostru l’horru, que formen Francisco Méndez y el productor Zeros participen col tema Fíu d’un pueblu, de composición propia. Xune Elipe, Primi Abella, Rubén Álvarez, Javi Rodríguez, Llorián García, Sergio Álvarez, Eladio Díaz y Agus Lara formen anguaño la banda de rock Dixebra, que presenta’l el cantar Como’l mar, con lletra de Primitivo Abella.
Tres de l’actuación de los trés candidatos, el xuráu formáu por especialistes en música y llingua asturiana, va decidir el cantar ganador. Mientres la deliberación del xuráu, el públicu va poder disfrutar de dos actuaciones. La primera, del grupu Llevólu’l sumiciu, qu’actúen fuera de concursu xunto con Anabel Santiago. Depués van facelo Carla Armas y Rubén García, que van interpretar col so grupu Tras el muro El que conoz a tierra, tema ganador del XIII Premiu «Camaretá», y otres composiciones. Tres d’esta actuación, va dase a conocer el nome del grupu gallardonáu y va facese entrega d’un troféu a los sos intérpretes.
El premiu, dotáu con 6.000 euros, incluye la realización d’un videoclip, la promoción y espardimientu del cantar ganador nos medios de comunicación y nos eventos organizaos o promovíos pol Gobiernu del Principáu d’Asturies, asina como nel circuitu «Autores nel Camín» del programa Asturies, Cultura en Rede.
Entraes de baldre
La entrada a la gala ye llibre y gratuita previa retirada d’invitación na web del eventu, na Recepción de la Llaboral, nel Centru d’Información Turística del Principáu d’Asturies (CITPA) n’Uviéu, nel Centru Niemeyer n’Avilés, nel teléfonu 952 076 262, n’unientradas.es y na web de Llaboral Ciudá de la Cultura.
Suscríbite a les nuestres novedaes
