El grupu de la flautista que grabó la versión exipcia de “Coyí d’un artu una flor” busca tocar n’Asturies
N’abril de 2020 la flautista inglesa Tamsin Elliot, el músicu exiptiu Tarek Elazhary (oud) y la percusionista tamién exipcia Salma Amr (riq), grababen una versión en clave oriental de la tradicional tonada “Coyí d’un artu una flor”. Agora la flautista Tamsim Elliot anda a la gueta de sitios onde actuar n’Asturies a finales d’ochobre col so grupu Solana, un quintetu asentáu en Bristol y con raigaños en Valencia, que fai una orixinal mezcla de músiques étniques y folclóriques cuasi siempre instrumentales.
Dende la so formación en Valencia en 2012, el proyeutu de world fusion Solana enganchó a los aficionados a la música étnica cola so propuesta. Les sos composiciones tán influenciaes pola música Klezmer, el folk célticu, el flamenco, el jazz y les músiques arábigues y del Magreb. El resultáu ye un soniu dinámicu y baillable que casa igual de bien con audiencies sentaes o coles audiencies propies de festivales de prau. Flautes, vigulín, curdión y guitarra española dan forma a unos temes nos que se nota la influyencia de grandes mayestros como Tigran Hamasyan, Kíla, Paco de Lucía o Dhafer Youssef.
Nos 10 años que lleven n’activo ganaron a pulsu una sólida reputación como grupu con bon directu, lo que los fai ser ún de los favoritos nel circuitu británicu de festivales de world music. Tienen publicaos cuatro discos; el caberu, Mirage, qu’asoleyaron el 13 de mayu. Quieren facer una xira pel Estáu español y Portugal nos meses d’ochobre/payares pa presentar esti álbum y cuenten que na cabera selmana d’ochobre podríen tocar n’Asturies si alcuentren un llugar afayadizu. Pue contactase con ellos a traviés del corréu musicasolana@gmail.com.
