Yá ta en YouTube el conciertu de Muyeres n’Encaja2

El pasáu 12 d’abril Muyeres tocaron n’Encaja2, el ciclu de conciertos en formatu íntimu qu’organiza’l Teatru Xovellanos de Xixón. La veterana formación escosó en poco díes toles entraes pa esta actuación única, pero yá se pue ver el conciertu completu en YouTube. Nél, Muyeres interpreten nueve de los trece cantares que dan forma al so últimu trabayu ‘Humanes‘, una obra que destaca por ser la primera qu’inclúi cantares de composición propia dientro de la estensa discografía de l’agrupación

L’Asociación de Música Tradicional Muyeres, ye ún de los nomes más importantes del folclor asturianu. Esti colectivu nació en 1993 cola unión de muyeres procedentes de dalgunos los grupos d’investigación etnográfica más destacaos. L’oxetivu que teníen yera’l de reivindicar la música de percusión del país y el protagonismu de la muyer nel caltenimientu de la tradición sonora asturiana. Cuasi 30 años depués, con seis discos publicaos y con una montonera d’espectáculos entamaos; siguen siendo una pieza fundamental de la cultura asturiana.

Mira l’actuación y merca discos de muyeres

Música n’asturianu n’Encaja2

Encaja2 nació en 2020 p’adaptar les actuaciones musicales del Xovellanos a les restricciones sanitaries por mor del Coronavirus. La caxa escénica del míticu teatru xixonés ye l’espaciu nel que grupos de dellos estilos interpreten una actuación de 40 minutos con un aforu de públicu mui reducíu, dando llugar a una esperiencia única que llueu s’emite per YouTube. Pel so escenariu yá pasaron les propuestes de música n’asturianu de L-R, Rodrigo Cuevas, Xaime Martínez y Antón Menchaca; y nesta séptima temporada la nuestra llingua vuelve a sonar gracies a los conciertos de Muyeres y Maramoniz.