Güextia: cuando l’asturianu se fixo rockeru (conciertu de 1984)
Esti documentu audiovisual ye una mui bona muestra de la fuercia y potencia que Güextia desarrollaben nes sos actuaciones, con un directo electrizante y ensin resquiebres, que se puede apreciar magar les deficiencies de la grabación. Foi rexistráu orixinalmente nes fiestes de Trevías (Valdés) de 1984 por un vecín d’esi llugar.
A Güextia bien se la podría axetivar como una ‘banda maldita’, ye dicir, una formación que lo tenía too pa «trunfar», anque fuera namás nel ámbitu propiu y pequeñu del país asturianu, pero que poles circunstancies temporales nes que desenvolvió’l so llabor viose tapecida y nun tuvo la reconocencia qu’ameritaben.
El grupu diba surdir como tal nel añu 1983 pente medies de los conceyos d’Avilés y Corvera, comandáu por un polifacéticu Adolfo Camilo Díaz (escritor, músicu, actor) que, depués d’una esperiencia teatral llamada Güestia qu’incluyía númberos musicales, decide siguir con esta última faceta pero yá de manera independiente col nome de Güextia (en 1980 yá tuviera otra esperiencia musical con una banda de rock duru n’asturianu llamada Guaxa). Pasín ente pasu, sobre bases lletrístiques y musicales del propiu Camilo, escomiencen a preparar repertoriu y dan los sos primeros conciertos.
La grabación del so únicu discu diba llegar en 1988, col títulu d’Inaux (Fono Astur), nel qu’asoleyen once temes d’un rock potente y compactu, nel que los sos componentes (ente ellos destaca’l guitarrista xixonés Rafa Kas) muéstrense como instrumentistes escepcionales y demuestren les posibilidaes espresives de la llingua asturiana. Aquel álbum llogra’l preste de la crítica musical, que lu empondera unánimemente, y trespasa les llendes del país, hasta’l puntu de qu’una gran compañía discográfica propón-yos publicar una versión en castellanu d’él, ufierta que rechacen pol so compromisu pa cola llingua asturiana. Sicasí, la so repercusión nos ambientes asturianistes nun foi tolo bona que yera esperable, nellos primaben daquella los sones más averaos a la tradición y, especialmente, al folk. Hai que tener en cuenta que, naquel momentu, taba viviéndose la primer gran fola de la Música Celta, qu’algamó n’Asturies bien de sonadía y repercusión. De toes maneres, Inaux representa un fitu na historia del rock n’asturianu, convirtiéndose nun referente pa otres formaciones que vendríen depués. La banda presentaría’l discu per bien de llugares del país y defenderíalu en directo con honestidá y mui bon facer, hasta que nel añu 1990 deciden abandonar el proyectu, convirtiendo aquel discu nun iconu del rock llariegu.
El documentu audiovisual qu’asoleyamos nel AMCA ye una mui bona muestra de la fuercia y potencia que Güextia desarrollaben nes sos actuaciones, con un directo electrizante y ensin resquiebres, que se puede apreciar magar les deficiencies de la grabación. Foi rexistráu orixinalmente en Video 2000 nes fiestes de Trevías (Valdés) por un vecín d’esi llugar.
