Inaugúrase en Sotrondio la Sala de la Canción Asturiana Silvino Antuña
Una estensa colección discográfica de la canción asturiana, discos inéditos y de pizarra, partitures y otros documentos en papel, grabadores o gramófonos, son dalgunos de los materiales que dan forma a la Sala de la Canción Asturiana Silvino Antuña, espaciu asitiáu na Biblioteca Pública de Sotrondio que s’inauguró’l pasáu vienres 12 de payares con una charra del musicólogu Héctor Braga sobre’l maestru de la tonada Silvino Antuña, organizada pola Asociación Bicentenario de San Martín del Rey Aurelio y na que participó tamién la vilba d’Antuña y donante de los materiales, Ceferina Cabeza.
Silvino Antuña Suárez (La Piquera, 1919; Sotrondio 2015), foi un referente de la canción asturiana que desendolcó un importante llabor nel fomentu de la tonada a traviés de la formación de nueves voces. Foi fundador na década de los 50 de l’Academia de la Canción Asturiana y profesor d’intérpretes que llueu se convirtieron en grandes de l’asturianada como El Che de Cabaños, Gerardo Orviz o Diagmina Noval, ente otros. Nel añu 2009, el Conceyu d’Uviéu concedió-y el V Premiu Nacional de Folclore ‘Martínez Torner’. Durante tol tiempu que se dedicó a la canción asturiana foi construyendo una amplia discografía d’esti xéneru que ta considerada, según fontes del Aytu. de Samartín del Rei Aurelio «como la meyor colección musical del folclor».
Agora esta discografía, xunto con otros fondos documentales del llegáu de Silvino Antuña pueden vese na sala que tien el so nome, un aula na que lleva trabayándose dende 2017 -coincidiendo cola concesión a títulu póstumu d’una cai en Sotrondio pa homenaxear a Antuña- y qu’agora ye una realidá.
