Ixuxú Cultura celebra’l so aniversariu con Skontra y Zea Mays

La Fiesta del I+X Aniversariu d’Ixuxú Cultura va celebrase’l 24 de febreru a les 20h na sala Tizón Sound de Xixón. Les entraes tán yá a la venta de forma adelantada en musikaze.net con un preciu de 12 €, 15 € en taquilla.

Xicu Ariza, responsable de Musicasturiana.com, entama Ixuxú Cultura en 2013 como asociación baxo’l nome d’Ixuxú Asturies-Euskal Herria Elkartea. Depués d’unos años d’inactividá, dende 2015-2016, renaz en 2023 yá como Ixuxú Cultura, plataforma de programación cultural en llingües minorizaes -especialmente asturianu y euskera- con mensaxe social y/o desendolcada por muyeres.

Zea Mays ye la primer banda vasca qu’aportó a Asturies de la mano d’Ixuxú en 2013. Anició’l so camín en Bilbao va casi trés décades, en 1997. N’estos 27 años d’actividá asoleyaron once trabayos discográficos de rock n’euskera, incluyendo un homenaxe pel so 20 aniversariu: 20 Urte (2017). El so últimu discu, de 2022, ye Adore Kemena Kuraia. Esti últimu añu ficieron una xira pela so tierra y otros llugares de la península y el restu d’Europa como Barcelona, Madrid, Galiza, Asturies (Uviéu), Berlín y Suiza.

Pela so parte, el míticu grupo de punk-folk asturianu Skontra ye’l que más vegaes llevó Ixuxú a Euskal Herria. Siempre cola so sonoridá asturiana y les sos lletres reivindicatives, grabaron y asoleyaron 4 discos: Semeya de la rabia (2006), Cantares pa dempués d’una guerra (2008), Mazcando Miseries (2010) y Foguera (2015). En 2022 reeditaron en vinilu’l so primer trabayu al cumplise 20 años dende la so formación.

Más eventos d’Ixuxú Cultura próximamente

  • II Semando Fest, festival de música moza n’asturianu: Sandra Álvarez + Noemí González, Mostru L’Horru, Guieldu y Ochobre – 9 de febreru, Lata de Zinc (Uviéu).
  • Conciertos de Dupla, duú de música urbana rural n’euskera – 15 de marzu, Lata de Zinc (Uviéu) / 16 de marzu, La Traviesa (L’Infiestu).

Merca los discos de Skontra y sienti a Zea Mays en Spotify

Dexa un comentariu

X