Alicia y Mar Álvarez –Pauline en la Playa– actúen mañana, martes 23 de xineru, a les 19h nel Patiu del Centru Cultura Antiguu Institutu de Xixón. Al filu del conteníu d’ ‘Asturianes’, nel conciertu, en formatu acústicu y col so estilu pop intimista, van poder sintise, amás de temes propios de Pauline en la Playa, cantares venceyaos a les protagonistes de la esposición. La entrada ye de baldre hasta completar aforu.
‘Asturianes’, disponible hasta el prósimu llunes 29 de xineru na Sala 3 del CCAI, ta basada nel llibru del mesmu nome, escritu por Alicia Álvarez con ilustraciones de María Ortiz. Percuerre la figura de venti muyeres y colectivos inspiradores d’Asturies como Aida Lafuente, Margarita Salas, Les Cigarreres, María Luisa García, Marica Andallón, Les Comadres, Urraca l’Asturiana o Xosefa Xovellanos, col enfotu de visibilizar a les muyeres referentes d’Asturies dende una perspeutiva didáutica. Musicasturiana.com collaboró na so configuración col préstamu d’un vinilu de La Busdonga y el discu Violética de Nacho Vegas nel qu’apaez “Aida”, un cantar dedicáu a Aida Lafuente.
La representación ye diversa, con époques y perfiles estremaos: revolucionaries, escritores, científiques, deportistes, pintores, trabayadores, cocineres, polítiques y músiques. Nesti últimu grupu, el de la escena musical, pueden alcontrase les figures d’Obdulia Álvarez La Busdonga, primer muyer que grabó discos de canción asturiana nes primeres décades del sieglu XX; el colectivu de música tradicional Muyeres, que reivindica el papel de la muyer como protagonista y depositaria de la tradición oral y musical asturiana; y los dos primeros grupos femeninos dafechu d’Asturies nel ámbitu de la música indie, Undershakers y Nosoträsh.
Suscríbite a les nuestres novedaes
